Ermenistanyň Ýerewan şäherinde iş saparynda bolýan Türkmenistanyň Prezidenti Serdar Berdimuhamedow Birleşen Milletler Guramasynyň Biologik dürlülik hakyndaky konwensiýasyna gatnaşyjy taraplaryň 17-nji maslahatynyň (gysgaldylan ady COP17) Liderler sammitine gatnaşdy.
“COP17” maslahatynyň çäklerinde ýokary derejeli sammit «Tebigatyň hatyrasyna liderler» mowzugy bilen Ýerewanda geçirilýär. Oňa Türkmenistanyň Prezidenti Serdar Berdimuhamedow bilen bir hatarda BMG-niň Baş sekretayr Antonio Guterriş, Ermenistanyň Prezidenti Waagn Haçaturýan, Ermenistanyň Premýer-ministri Nikol Paşinýan, Gazagystan Respublikasynyň Prezidenti Kasym-Žomart Tokaýew, Täjigistan Respublikasynyň Prezidenti Emomali Rahmon, Gyrgyz Respublikasynyň Prezidenti Sadyr Žaparow, Gruziýanyň Premýer-ministri Irakli Kobahidze, Zanzibar awtonomiýasynyň Prezidenti Huseýn Ali Mwini, Alžir Halk Demokratik Respublikasynyň Milli Geňeşiniň başlygy Azuz Nasrini we Halkara Frankofoniýa Guramasynyň Baş sekretary Luiza Muşikiwabo we köp sanly wekiliýet gatnaşýar.
Sammitiň esasy maksady 2022-nji ýylda kabul edilen Biologik dürlülik boýunça Kunmin–Monreal ählumumy çarçuwaly maksatnamasynyň durmuşa geçirilişinde gazanylan öňegidişliklere taryhda ilkinji gezek ählumumy derejede baha bermekden ybaratdyr.
“COP17” maslahaty Birleşen Milletler Guramasynyň (BMG) howandarlygynda geçirilýän halkara forum bolup, ol 2026-njy ýylyň 19–30-njy oktýabry aralygynda Ermenistan Respublikasynyň paýtagty Ýerewan şäherinde geçirilýär.
Maslahat biologik dürlüligi gorap saklamak, tebigy serişdelerden durnukly peýdalanmak we genetiki serişdelerden alynýan peýdalary adalatly paýlaşmak meselelerine bagyşlanýar.