Türkmenistan elektrik energiýasyny eksport etmek üçin Hazar deňziniň düýbi bilen elektrik kabelini çekmek taslamasyna gatnaşmak mümkinçiligini öwrenýär.
Bu barada Şäherleriň Bütindünýä forumynyň (WUF13) çäklerinde Türkmenistanyň Energetika ministrliginiň “Türkmenenergo” döwlet elektrik energetika korporasiýasynyň Daşary ykdysady aragatnaşyklar we eksport bölüminiň uly hünärmeni Abdulla Jelilow “Report” agentligine beren beýanatynda aýtdy.
Onuň bellemegine görä, Türkmenistan Türkmenbaşy şäherinde kuwwaty 1574 MW bolan utgaşdyrylan görnüşde elektrik stansiýasynyň gurluşygyny alyp barýar. Bu desga geljekde eksport üpjünçiligi üçin esasy önümçilik çeşmesi bolup biler.
“Biz Hazar deňziniň düýbi bilen kabel çekmek meselesini öwrenýäris. Şol bir wagtda-da Türkmenbaşyda kuwwaty 1574 MW bolan utgaşdyrylan görnüşde elektrik stansiýamyz gurulýar. Ol gurlup gutarylandan soň, şu stansiýa arkaly we Hazar deňziniň düýbi bilen çekiljek kabel üsti bilen elektrik energiýasyny Azerbaýjana, ol ýerden bolsa beýleki ýurtlara eksport edip bileris” diýip, ol belledi.
Jelilow bu meseläniň Azerbaýjan bilen Türkmenistanyň arasyndaky hökümetara toparynyň çäklerinde yzygiderli maslahatlaşylýandygyny aýtdy.
“Biz bu taslamany durmuşa geçirmek isleýäris” diýip, ol belledi.
“Türkmenenergo” wekiliniň aýtmagyna görä, taslama ähli gatnaşyjylar üçin ykdysady taýdan bähbitli bolup biler, şunda Azerbaýjan elektrik energiýasyny beýleki döwletlere geçirmek üçin möhüm üstaşyr ýurt hökmünde garalýar.