Ýewropanyň naýbaşy ýaryşy bolan Çempionlar Ligasynyň 4-nji tapgyrynyň duşuşyklary geçirildi. “E”, “F”, “G” we “H” toparçalarynda jemi 8 duşuşyk geçirildi. Şolaryň netijesinde, 4-nji tapgyrda garşydaşlaryny ýeňen Germaniýanyň “Bawariýa” bilen Italiýanyň “Ýuwentus” toparlary indiki tapgyra çykmagy başardy.
4 OÝUNDA 4 ÝEŇIŞ
“E” toparçasynda “Bawariýa” topary Portugaliýanyň “Benfika” toparyny 5:2 hasabynda ýeňdi. “Bawariýa” toparyndan 26-njy, 61-nji we 84-nji minutlarda Robert Lewandowski, 32-nji minutda Sergi Gnabri we 49-njy minutda Leroý Sane tapawutlandy.
LEWANDOWSKIDEN REKORD
Şu ýyl “Altyn top” baýragyny gazanmagyna garaşylýan “Bawariýany” polşaly hüjümçisi Robert Lewandowski het-terik etdi. Şeýlelikde, ol Çempionlar ligasyndaky gollarynyň sanyny 81-e ýetirdi. Lewandowski bu netijäni iň az duşuşyk geçirip (100 duşuşyk) gazanandygy üçin täze redkordyň eýesi boldy.
RONALDO ÝENE-DE TOPARYNY HALAS ETDI
Kristiano Ronaldoly “Mançester Ýunaýted” topary myhmançylykda Italiýanyň “Atalanta” topary bilen 2:2 hasabynda deňme-deň oýnady. 2:0 hasabynda ýeňlip barýan “Mançester Ýunaýted” toparyny 45+1-nji hem-de 90+1-nji minutlarda geçiren gollary bilen Ronaldo halas etdi.
“ÝUWENTUS” INDIKI TAPGYRA GYKMAGY BAŞARDY
Italiýanyň “Ýuwentus” topary Russiýanyň “Zenit” toparyny 4:2 hasabynda ýeňip, indiki tapgyra çykmagy başardy. “Ýuwentusyň” gollaryny Paulo Dibala (2), Federiko Kýeza we Alwaro Morato öz adyna ýazdyrdy.
ÇEMPIONLAR LIGASYNDA GEÇIRILEN DUŞUŞYKLARYŇ NETIJELERI
“Malmö” 0-1 “Çelsi”
“Wolfsburg” 2-1 “Salzburg”
“Wilýareal” 2-0 “Ýang-Boýz”
“Ýuwentus” 4-2 “Zenit”
“Bawariýa” 5-2 “Benfika”
“Sewilýa” 1-2 “Lill”
“Dinamo Kiýew” 0-1 “Barselona”
“Atalanta” 2-2 “Mançester United”