«Ak şäherim Aşgabat-2026» halkara sergisiniň we maslahatynyň ilkinji güni uly netijelere beslendi. Türkmenistan düzümleýin we maýa goýum hyzmatdaşlygyny giňeltmäge gönükdirilen resminalaryň saldamly toplumyna daşary ýurtly hyzmatdaşlar bilen gol çekdi. Gol çekilen 11 sany resminama strategik ugurlary: sanly tehnologiýalary, energetikany, agyr senagaty we paýtagtyň şäher düzümini giň gerimde ösdürmegi öz içine alýar.
Sanlylaşdyrmak we energetika, himiýa senagatyndaky halkara hyzmatdaşlyk
Ylalaşyklaryň tapgyry ýangyç-energetika we kommunikasiýa pudaklaryna ýokary tehnologiýaly kompaniýalary çekmäge hem-de uzak möhletleýin hyzmatdaşlygy ýola goýmaga gönükdirildi.
-
Şunlukda, ýurduň esasy edaralary (Türkmenistanyň Energetika ministrligi, Türkmenistanyň Aragatnaşyk ministrligi, Türkmenistanyň Maliýe we ykdysadyýet ministrligi) bilen Singapuryň «Bitdeer Technologies Group» tehnologik toparynyň arasynda Özara düşünişmek hakynda Ähtnama gol çekildi.
-
Şeýle hem «Garabogazkarbamid» zawodyny abatlamak we oňa tehniki hyzmat boýunça özara düşünişmek hakynda Ähtnama gol çekildi. Bu üçtaraplaýyn ylalaşyk «Türkmenhimiýa» döwlet konserniniň, Türkiýäniň «Çalık Enerji» kompaniýasynyň hem-de Ýaponiýanyň «Mitsubishi Heavy Industries Asia Pacific» we «Mitsubishi Corporation Machinery» korporasiýalarynyň arasynda baglaşyldy.
-
Türkmenistanyň Energetika ministrligi Ýaponiýanyň «Muroosystems Corporation» korporasiýasy bilen baglaşylan ylalaşykda hyzmatdaşlygyň esasy şertlerini kesgitledi.
-
«Türkmenhimiýa» döwlet konserni Hytaýyň «Hong Kong Richie Sweet Co., Ltd» kompaniýasy bilen özara düşünişmek hakynda Ähtnama baglaşdy.
Ýol-ulag düzümini döwrebaplaşdyrmak
Ähmiýeti boýunça ýene-de bir saldamly resminamalar topary Ýewropanyň inženerçilik tejribesini we Hytaýyň agyr tehnikalaryny çekmäge degişlidir.
-
Türkmenistanyň Awtomobil ýollary ministrligi Germaniýanyň meşhur inženerçilik kompaniýasy bolan «Inros Lackner SE» bilen özara düşünişmek hakynda Ähtnama gol çekdi.
-
Ministrlik Hytaý Halk Respublikasynyň öňdebaryjy öndürijileri bilen iki sany ylalaşyk baglaşdy. Bular: «Shantui Construction Machinery Co., Ltd.» kompaniýasy bilen hyzmatdaşlyk hakynda Ähtnama we «Sinotruk Hong Kong Capital Holding Limited» kompaniýasy bilen özara hereket etmek hakynda Ähtnamadyr.
Aşgabadyň durmuş düzümini ösdürmek
Resminamalar toplumynyň bir bölegi dolulygyna Aşgabat şäher häkimliginiň Türkmenistanyň hususy pudagynyň wekilleri bilen baglaşan şertnamalaryndan ybarat boldy. Olaryň ählisi paýtagtyň Büzmeýin etrabynyň Bagyr ýaşaýyş toplumyny gurmaga we abadanlaşdyrmaga gönükdirilendir.
-
Ýanaşyk ýerleri abadanlaşdyrmak bilen bir wagtyň özünde 2 sany (hersinde 720 orunlyk) umumybilim berýän orta mekdebiň taslamasyny düzmek we gurmak baradaky potrat işleri Türkmenistanyň hususy kärhanasyna — «Gök depeler» hojalyk jemgyýetine ynanyldy.
-
Şol bir wagtda «Gök depeler» kärhanasy şol ýaşaýyş toplumynda 320 orunlyk çagalar bagyny gurmak barada hem şertnama baglaşdy.
-
Bagyr ýaşaýyş toplumynda täze Saglyk öýüniň taslamasyny düzmegi we gurluşygyny Türkmenistanyň «Hil merkez» hususy kärhanasy amala aşyrar.
Şeýlelikde, «Ak şäherim Aşgabat — 2026» maslahatynyň meýdançasynda gol çekilen resminamalaryň sanawy şäheriň we umuman ýurduň ykdysadyýetiniň ösüşine toplumlaýyn çemeleşilýändigini görkezýär: bu Singapuryň IT-maýadarlaryny we ýapon tehnologiýalaryny çekmekden başlap, paýtagtyň içindäki durmuş wezipelerini takyk çözmäge çenli ugurlary öz içine alýar.
Gol çekilen resminamalaryň sanawy:
-
Türkmenistanyň Energetika ministrliginiň, Türkmenistanyň Aragatnaşyk ministrliginiň, Türkmenistanyň Maliýe we ykdysadyýet ministrliginiň hem-de Singapuryň «Bitdeer Technologies Group» kompaniýasynyň arasynda özara düşünişmek hakynda Ähtnama.
-
«Garabogazkarbamid» zawodyna abatlamak we tehniki hyzmat ulgamynda hyzmatdaşlyk etmek barada «Türkmenhimiýa» döwlet konserniniň, Ýaponiýanyň «Mitsubishi Heavy Industries Asia Pacific, Pte. Ltd» we «Mitsubishi Corporation Machinery Inc.» kompaniýalarynyň, şeýle hem Türkiýäniň «Çalık Enerji Sanayi ve Ticaret A.Ş» kompaniýasynyň arasynda Özara düşünişmek hakynda Ähtnama.
-
Türkmenistanyň Energetika ministrliginiň we Ýaponiýanyň «Muroosystems Corporation» korporasiýasynyň arasynda esasy şertler hakynda Ylalaşyk.
-
«Türkmenhimiýa» döwlet konserni bilen Hytaý Halk Respublikasynyň «Hong Kong Richie Sweet Co., Ltd» kompaniýasynyň arasynda özara düşünişmek hakynda Ähtnama.
-
Türkmenistanyň Awtomobil ýollary ministrliginiň we Germaniýa Federatiw Respublikasynyň «Inros Lackner SE» kompaniýasynyň arasynda özara düşünişmek hakynda Ähtnama.
-
Türkmenistanyň Awtomobil ýollary ministrliginiň we Hytaý Halk Respublikasynyň «Shantui Construction Machinery Co., Ltd.» kompaniýasynyň arasynda hyzmatdaşlyk boýunça özara düşünişmek hakynda Ähtnama.
-
Türkmenistanyň Awtomobil ýollary ministrliginiň we Hytaý Halk Respublikasynyň «Sinotruk Hong Kong Capital Holding Limited» kompaniýasynyň arasynda hyzmatdaşlyk hakynda Ähtnama.
-
Aşgabat şäher häkimligi bilen «Gök depeler» hojalyk jemgyýetiniň arasynda Aşgabat şäheriniň Büzmeýin etrabynyň Bagyr ýaşaýyş toplumynda ýanaşyk ýerlerini abadanlaşdyrmak bilen, 720 orunlyk umumybilim berýän orta mekdebiň taslamasyny düzmek we ony gurmak baradaky şertnama.
-
Aşgabat şäher häkimligi bilen «Gök depeler» hojalyk jemgyýetiniň arasynda Aşgabat şäheriniň Büzmeýin etrabynyň Bagyr ýaşaýyş toplumynda ýanaşyk ýerlerini abadanlaşdyrmak bilen, ýene bir 720 orunlyk umumybilim berýän orta mekdebiň taslamasyny düzmek we ony gurmak baradaky şertnama.
-
Aşgabat şäher häkimligi bilen «Gök depeler» hojalyk jemgyýetiniň arasynda Aşgabat şäheriniň Büzmeýin etrabynyň Bagyr ýaşaýyş toplumynda ýanaşyk ýerlerini abadanlaşdyrmak bilen, 320 orunlyk çagalar bagynyň taslamasyny düzmek we ony gurmak baradaky şertnama.
-
Aşgabat şäher häkimligi bilen «Hil merkez» hususy kärhanasynyň arasynda Aşgabat şäheriniň Büzmeýin etrabynyň Bagyr ýaşaýyş toplumynda Saglyk öýüniň taslamasyny düzmek we ony gurmak baradaky şertnama.