Koreýa Respublikasynda döwlet saparynda bolýan Türkmenistanyň Prezidenti Serdar Berdimuhamedow Koreýa Respublikasynyň Prezidenti Li Çže Mýon tarapyndan resmi taýdan garşylandy. Soňra iki ýurduň döwlet Baştutanlarynyň gatnaşmagynda ýokary derejedäki gepleşikler geçirildi.
Koreý metbugatynyň habar bermegine görä, gepleşikleriň jemleri boýunça energetika we infrastruktura, şeýle hem beýleki ugurlardaky hyzmatdaşlyk gatnaşyklaryny ösdürmäge gönükdirilen 13 sany ylalaşyga gol çekildi.
Energetika, zawodlar, ulag we logistika ulgamlarynda ykdysady hyzmatdaşlygy ep-esli giňeltmek boýunça ylalaşyldy. Iki ýurt 13 sany ylalaşyga we özara düşünişmek hakynda ähtnama, şol sanda maýa goýumlary goramak baradaky ylalaşyga gol çekip, koreý kompaniýalarynyň Türkmenistanyň bazaryna girmegi üçin institusional binýady berkitdiler.
Koreýa Respublikasynyň Prezidenti Ýakyn Gündogar sebitinde bolup geçen wakalar döwründe koreý raýatlarynyň ygtybarly öýlerine dolanmagy üçin beren goldawlary üçin Türkmenistanyň Prezidentine hoşallygyny bildirdi.
Koreýa Respublikasynyň Prezidenti Li Çže Mýon Türkmenistanyň baý energetika serişdelerini we geosyýasy artykmaçlyklaryny Koreýanyň senagat hem-de tehnologiki bäsdeşlige ukyplylygy bilen utgaşdyrmak meýilnamasyny öňe sürdi.
Koreýa tarapy Türkmenistanyň baý serişdeleriniň ýokary goşulan gymmatly senagata we iş orunlaryny döretmek üçin hem-de Hazar deňzini Merkezi Aziýa bilen baglanyşdyrýan logistika we söwda üçin täze derweze bolmagy üçin bilelikde işleşmäge taýýardyklaryny mälim etdi.
iki ýurt maýa goýumlary höweslendirmek we goramak, infrastruktura, himiýa senagaty we zawodlar, demir ýol ulagy hem-de suw serişdelerini dolandyrmak ýaly ugurlary öz içine alýan 13 sany ylalaşyga we özara düşünişmek hakynda ähtnama gol çekdiler.
Bular arkaly olar Koreya kompaniýalarynyň nebit, gaz we himiýa, şeýle hem gurluşyk, ulag we logistika ýaly iri taslamalara gatnaşmagyny giňeltmegi, Garagum kanalyny döwrebaplaşdyrmak ýaly suw serişdeleri taslamalarynda hyzmatdaşlygy berkitmegi meýilleşdirýärler.