Tatarystanyň Baştutany Rustam Minnihanow we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow «Kazan» halkara atçylyk-sport toplumyna baryp gördüler. Bu barada Tatarystanyň Baştutanynyň metbugat gullugy habar berýär.
Ilki bilen Tatarystanyň kärhanalarynyň oba hojalyk we azyk önümleriniň görkezilen ýöriteleşdirilen sergisini synladylar. Türkmen halkynyň Milli Lideri «Kazan» atçylyk-sport toplumynyň işi bilen tanyşdyryldy, şeýle hem atly ýigitleriň görkezme çykyşlary boldy.
Şu günlerde Kazanda Russiýanyň sebitlerinden, şol sanda Tatarystandan, şeýle-de Yslam Hyzmatdaşlyk Guramasyna agza ýurtlardan — Türkmenistandan, Gazagystandan we Gyrgyzystandan gelen çapyksuwarlaryň arasynda at çapyşyklary geçirilýär.
Maglumat üçin: «Russiýa — Yslam dünýäsi: KazanForum» XVII halkara ykdysady forumynyň çäklerinde «Kazan» atçylyk toplumynda at çapyşyklary we Halkara çapyksuwarlaryň çempionaty geçirilýär. Bu waka Russiýanyň atçylyk pudagynyň ýokary derejesini görkezmäge, atçylyk sporty ulgamynda halkara gatnaşyklary berkitmäge, şeýle hem Kazany iri atçylyk çärelerini geçirmek üçin özüne çekiji meýdança hökmünde tanyşdyrmaga gönükdirilendir. Çapyşyklara atlaryň dürli tohumlary gatnaşýar. Olaryň arasynda tatar tohumynyň gatnaşmagyndaky «Tatar ganaty», «Uly Ýewraziýa hyzmatdaşlygy kubogy», «Tehnologik bileleşik kubogy», şeýle hem foruma we YHG-niň agza ýurtlaryna bagyşlanan baýraklar bar. Sport böleginde bolsa «Russiýanyň gymmatlygy» we «Tatarystan Respublikasynyň kubogy» ýaly ýaryşlar ýerleşdirildi.