Berkarar döwletiň täze eýýamynyň Galkynyşy döwründe «Garaşsyz, baky Bitarap Türkmenistan — bedew batly at-myradyň mekany» ýylynda ýaşlary telekeçilige çekmek, ýaş telekeçileriň döremegini gazanmak, olara başlangyç goldaw bermek babatda giň gerimli işler alnyp barylýar.
Türkmenistanda bazar ykdysadyýetine geçiş döwründen bäri telekeçilik döwlet syýasatynyň möhüm ugurlarynyň biri hökmünde ösdürilýär. Hususy pudagyň güýçlendirilmegi ykdysady ösüşi çaltlandyrmaga, täze iş orunlaryny döretmäge we ilatyň ýaşaýyş derejesini ýokarlandyrmaga ýardam edýär.
Türkmenistanyň Senagatçylar we telekeçiler birleşmesi (TSTB) ýurdumyzda hususy telekeçiligi ösdürmekde möhüm orny eýeleýär. Bu birleşme 2008-nji ýylda döredilip, müňlerçe telekeçini öz içine alýar. Onuň esasy maksady — telekeçileri goldamak, olaryň hukuklaryny goramak we täze taslamalary durmuşa geçirmekdir.
Soňky ýyllarda hususy pudagyň paýy ýurduň jemi içerki önüminde ep-esli artdy. Telekeçiler şu ugurlarda iş alyp barýarlar:
-
Gurluşyk we gurluşyk materiallary önümçiligi
-
Oba hojalygy we azyk önümçiligi
-
Dokma senagaty
-
Söwda we hyzmatlar ulgamy
-
Ulag-logistika hyzmatlary
Hususy kärhanalar içerki bazary ýerli önümler bilen üpjün edýär hem-de daşary ýurtlara eksporty artdyrýar.
Häzirki wagtda sanly ykdysadyýet telekeçiligiň ösüşinde möhüm ähmiýete eýedir. Elektron söwda, onlaýn hyzmatlar, maglumat tehnologiýalary täze mümkinçilikleri döredýär.
Türkmenistanda telekeçiligiň geljekki ösüşi üçin şu ugurlara aýratyn üns berilýär:
-
Eksport ugurlarynyň giňeldilmegi
-
Energiýa we himiýa senagatynda hususy taslamalar
-
Syýahatçylyk pudagynyň ösdürilmegi
-
“Ýaşyl ykdysadyýet” taslamalarynyň durmuşa geçirilmegi
Döwlet bilen hususy pudagyň hyzmatdaşlygy telekeçiligiň durnukly ösüşiniň esasy şertidir.
Türkmenistan döwletimizde telekeçiligi ösdürmek ykdysady ösüşiň möhüm hereketlendirijisidir. Döwlet goldawy, amatly hukuk şertleri we innowasion çemeleşmeler arkaly hususy pudagyň mümkinçilikleri giňelýär. Geljekde telekeçiligiň has-da ösmegi ýurduň ykdysady kuwwatyny artdyrar we halkyň abadançylygyny ýokarlandyrar.
Şunuň bilen birlikde, telekeçiligi ösdürmäge aýratyn ähmiýet beirlýän döwürde bu ugurda ýaş hünärmenleri taýýarlamk işi hem aýratyn çemeleşmä eýedir. Halkara senagatçylar we telekeçiler uniwersiteti ýurdumyzda ykdysady ugur boýunça ýokary hünärli hünärmenleri taýýarlaýan döwrebap ýokary okuw mekdebi bolup durýar. Ol telekeçiligi ösdürmek we ýaşlaryň işjeňligini ýokarlandyrmakda möhüm rol oýnaýar. Uniwersitet Türkmenistanyň Senagatçylar we telekeçiler birleşmesiniň başlangyjy bilen döredildi. Bu bolsa okuw bilen önümçiligiň arasynda berk arabaglanyşygy üpjün edýär.
Uniwersitet daşary ýurtlaryň ýokary okuw mekdepleri bilen hyzmatdaşlyk alyp barýar. Bu hyzmatdaşlyk talyplara daşary ýurt tejribesini öwrenmäge, halkara maslahatlara gatnaşmaga we bilim derejesini ýokarlandyrmaga mümkinçilik berýär. Şeýle hem daşary ýurt dilleriniň öwredilmegine uly ähmiýet berilýär. Bu hem Türkmenistanyň hususy pudagy üçin döwrebap hünärmenleriň üpjün edilmegi üçin wajypdyr.
Halkara senagatçylar we telekeçiler uniwersiteti Türkmenistanda ykdysady ösüşi üpjün edýän hünärmenleri taýýarlamakda möhüm orny eýeleýär. Ol ýaşlara ýokary hilli bilim bermek bilen bir hatarda, telekeçilik ruhuny ösdürmäge hem goşant goşýar. Geljekde bu ýokary okuw mekdebi ýurdumyzyň ykdysady ösüşine mynasyp goşant goşjak hünärmenleriň täze neslini taýýarlamagy dowam etdirer.
Ýazmuhammet Nepesow, Döwletgeldi Gurbanmyradow,
Halkara senagatçylar we telekeçiler uniwersitetiniň talyplary.