Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Gazagystan Respublikasynyň Prezidenti Kasym-Žomart Tokaýewiň arasynda telefon arkaly söhbetdeşlik boldy. Bu barada “Watan” habarlar gepleşiginde habar berildi.
Bellenilip geçilişi ýaly, türkmen halkynyň Milli Lideri Prezident Kasym-Žomart Tokaýewi Türkmenistan bilen Gazagystan Respublikasynyň, şeýle hem iki halkyň arasyndaky däp bolan dost-doganlyk we hoşniýetli goňşuçylyk gatnaşyklaryny ösdürmäge goşýan uly şahsy goşandy üçin minnetdarlyk bildirip, möhüm syýasy waka- Gazagystan Respublikasynyň Gurultaýynyň ilkinji saýlawlarynyň geçirilmegi mynasybetli hormatly Prezidentimiz Serdar Berdimuhamedowyň, şeýle hem hut öz adyndan gutlaglaryny beýan etdi.
– Bu saýlawlaryň netijelerine Gazagystanyň halkynyň paýhasly çözgüdi we erk-islegi, Siziň şahsy syýasy ýeňşiňiz hem-de ýolbaşçylygyňyzda döwletiň syýasy, ykdysady we jemgyýetçilik durmuşynda üstünlikli amala aşyrylýan özgertmeleriň netijesi hökmünde garaýarys – diýip, Gahryman Arkadagymyz belledi.
Gazagystan Respublikasynyň Prezidenti Kasym-Žomart Tokaýew gutlaglar hem-de hoşniýetli sözler üçin Gahryman Arkadagymyza hoşallyk bildirdi hem-de Türkmenistanyň goldawyna we Gahryman Arkadagymyzyň Gazagystan üçin taryhy waka parlament saýlawlaryna şahsy ünsüne ýokary baha berýändigini belledi.
Şeýle hem Gazagystan Respublikasynyň Prezidenti Kasym-Žomart Tokaýew Türkmenistanyň synçylarynyň Gurultaýyň saýlawlaryna taýýarlyk döwründe we saýlawlar geçirilende netijeli işländiklerini belledi.
Gazak Lideri iki ýurduň kanun çykaryjylyk edaralarynyň mundan beýläk-de netijeli hyzmatdaşlyk etjekdiklerine ynam bildirdi.