Birleşen Arap Emirlikleriniň milli baýramy – Milli gününiň 53 ýyllygy Türkmenistanyň paýtagty Aşgabat şäherinde bellendi. Paýtagtymyz Aşgabadyň iň owadan künjekleriniň birinde ýerleşýän “Ýyldyz” myhmanhanasynda guralan kabul edişlik dabarasyna “Ata Watan Media” topary hem gatnaşdy.
Birleşen Arap Emirlikleriniň Türkmenistandaky Adatdan daşary we Doly ygtyýarly ilçisi ahmed Alhaý Al-Hameli tarapyndan guralan BAE-niň Milli gününiň 53 ýyllygy dabarasyna Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow gatnaşdy. Şeýle hem dabara gatnaşanlaryň hatarynda ýurdumyzdaky daşary ýurtlaryň ilçileri we köp sanly myhmanlar bar.
Dabaranyň başynda Türkmenistanyň we BAE-niň milli senalary ýaňlandy. Soňra BAE-niň ilçisi Alhaý Al-Hameli çykyş etdi. Ol öz çykyşynda BAE bilen Türkmenistanyň arasyndaky gatnaşyklaryň elmydama ýokary işjeňlik bilen tapawutlanýandygyny belledi.
– Ikitaraplaýyn gatnaşyklar ähli derejelerde görlüp-eşidilmedik ösüşe eýe bolýar. Şeýlelik bilen, 2024-nji ýylyň birinji ýarymynda iki ýurduň arasyndaky söwda dolanyşygynyň möçberi 2023-nji ýyl bilen deňeşdirilende 5,9 göterim ýokarlandy, şol döwürde nebit däl önümleriň söwdasynyň möçberi takmynan 1 milliard 300 million dollara barabar boldy. Öňümizdäki ýyllarda bu görkezijini iki esse artdyrmagy maksat edinýäris. Häzirki wagtda BAE Türkmenistanyň iň uly dördünji söwda hyzmatdaşydyr – diýip, ilçi belledi.
Şeýle hem ilçi iki ýurduň arasynda medeni-ynsanperwer ugurdaky gatnaşyklaryň has-da pugtalanýandygyny belläp, sport ulgamynda hem hyzmatdaşlygyň ösdürilýändigini aýtdy.
Şu ýylyň awgustynda BAE-niň ilçihanasy Türkmenistanyň Daşary işler ministrligi bilen hyzmatdaşlykda Türkmenistanda Abu-Dabi welosiped klubynyň ýetginjekleriniň okuw türgenleşigini gurnady. Iki ýurduň arasyndaky diplomaitk gatnaşyklaryň ýola goýulmagynyň 29 ýyllygy mynasybetli BAE-niň ilçihanasy 120 türgeniň gatnaşmagynda “BAE-Türkmenistan fitnes oýunlary” ýaryşynyň 2-njisini geçirdi. 16-njy noýabrda Türkmenistanyň ýygyndysy Abu-Dabide geçirilen welosiped hepdeliginiň çäginde “Gran Fondo” ýaryşyny gatnaşdy. Şu aýyň dowamynda ilçihana Türkmenistanyň Welosport federasiýasyna 4 sany welosiped sowgat berdi, diýip ilçi Alhaý Al-Hameli aýtdy.
Mundan başga-da, ilçi öz ýurdunyň ykdysady üstünlikleri barada durup geçdi. BAE dünýä arenasynda durnukly ykdysady ösüş üçin öňdebaryjy model hökmünde ýüze çykdy, ýurduň daşary söwdasynyň möçberi 2024-nji ýylyň birinji ýarymynda 381 milliard ABŞ dollaryndan gowrak bolup, rekord goýdy. Bu görkeziji BAE-nyň daşary söwdasynyň 11 göterim ýokarlanandygyny görkezýär. Şu ýylyň ahyryna çenli ykdysady ösüş ýylda 4 göterime ýeter.
2024-nji ýylda BAE ykdysady durnuklylyk görkezijisi boýunça dünýäde birinji, ýurduň bäsdeşlik ukyby boýunça dünýäde ýedinji orny eýeledi.
Üstünlikler nukdaýnazaryndan “Emirates Airlines” howa ýollarynyň dünýäniň iň gowy awiakompaniýasy hökmünde birinji orny eýeländigini bellemek bolar. 2023-nji ýylda ýurduň howa menzillerinden 134 million ýolagçy geçdi.
BAE 2024-nji ýylda emeli intellekt indeksinde dünýäde 20-nji orny eýeledi. 2024-nji ýylyň sentýabr aýynda BAE 100 milliard dollara çenli emeli intellekt infrastrukturasyna maýa goýumlary üçin global hyzmatdaşlygy ýola goýdy. Pasport indeksine görä 2024-nji ýylda BAE-niň pasporty dünýäde birinji ýerde durýar, bu pasportuň eýeleri wizasyz 180 ýurda syýahat edip bilýär.
Şeýle hem dabarada çykyş eden Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow iki ýurduň arasyndaky döwletara gatnaşyklarynyň okgunly ösüşine uly kanagatlanma bildirdi. Ýaňy-ýakynda BAE-niň ministrleriniň Türkmenistana örän netijeli saparynyň bolandygyny belläp, şol bir wagtda Türkmenistanyň daşary işler ministriniň ýolbaşçylygyndaky wekiliýetiň BAE-de saparda bolangyny aýtdy.
Wise-premýer iki ýurduň arasyndaky gatnaşyklaryň ähli ugurlarda, syýasy, söwda-ykdysady hem-de ylym, bilim, medeniýet we sport ulgamlarynda işjeň ösdürilýändigine kanagatlanma bildirdi.
Resmi çykyşlardan soňra dabara gatnaşyjylara hödür-kerem edildi.