Täjigistan 2032-nji ýyla çenli “ýaşyl ykdysadyýet” boýunça ösüş strategiýasynyň esasynda energiýa önümçiligini dolulygyna gaýtadan dikeldilýän energiýa çeşmelerine geçmäge, 2037-nji ýylda bolsa, “ýaşyl” ýurda öwrülmegi meýilleşdirýär. Bu barada Täjigistanyň Prezidenti Emomali Rahmon Azerbaýjanyň paýtagty Baku şäherinde geçirilen BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň konferensiýasynyň 29-njy mejlisinde (COP29) eden çykyşynda belläp geçdi.
– Häzirki wagtda elektrik energiýasynyň 98 göterimi gidroeenergetikanyň hasabyna öndürilýär. Karbon gazlarynyň zyňyndylary boýunça Täjigistan dünýäde 130-njy orunda durýar – diýip, belledi.
Täjik Lideri soňky 5 ýylda tutuş dünýäde howalaryň has yssy bolandygyny belläp, howanyň üýtgemegine garşy göreşi güýçlendirmäge çagyrdy.
Ol buzluklaryň eremek meselesine ünsi çekip, Täjigistanyň buzluklary goramaga gönükdirilen başlangyçlaryny belläp geçdi.
Emomali Rahmon 2025-nji ýylyň maýynda Duşenbe şäherinde buzluklary goramak boýunça halkara maslahatyň geçiriljekdigini belledi.
Täjik Lideri çykyşynyň ahyrynda Bütindünýä Meteorologiýa guramasynyň howandarlygynda Duşenbe şäherinde glýasiologiýa boýunça sebitleýin utgaşdyryjy merkezi döretmegi teklip etdi.