Dünýä jemgyýetçiliginiň ünsüni çekýän ABŞ-daky prezident saýlawlaryna sanlyja gün galdy. 5-nji noýabrda Donald Tramp bilen Kamala Harris ABŞ-nyň nobatdaky Prezidenti bolmak üçin bäsleşerler.
Iri syýasy-jemgyýetçilik wakasy – prezident saýlawlary üçin öňünden ses bermek işi başlady. Bu babatda ilkinji sesler ABŞ-nyň Jorjiýa ştatynda berildi. Soňky maglumatlara görä, wagtyndan öň ses bermäge 252 müňden gowrak saýlawçy gatnaşdy. Bu 2020-nji ýyldaky saýlaw bilen deňeşdirilende rekord boldy. Ozalky saýlawda bu ştatda wagtyndan öň ses bermäge 136 müň adam gatnaşypdy.
2020-nji ýyldaky saýlawlardan soňra ştatlardaky kanunçylyklaryň üýtgemegi bilen saýlaw uçastoklarynyň sany azaldy, 7 gün 24 sagat açyk bolýan saýlaw uçastoklarynda belli wagtlarda ses bermek işi guralýar.
Ertir ýurduň Demirgazyk Karolina ştatynda wagtyndan öň ses bermek işi geçiriler.
ABŞ-da 60-njy gezek geçirilýän prezident saýlawlary 5-nji noýarbda guralar. Amerikanyň halky ýurduň iki iri syýasy partiýasy Demokratik partiýasynyň dalaşgäri Kamala Harrisiň hem-de Respublikan partiýanyň dalaşgäri Donald Trampyň dalaşgärliginde geçirilýän saýlawlarda ses bererler.
Jorjiýa – saýlawlardaky esasy 7 ştatyň biridir, bu ştatdaky sesler saýlawlaryň ýagdaýyna öz täsirini ýetirip bilýär.
ABŞ-nyň taryhynda 60-njy gezek prezident saýlawlary geçiriler we ýurduň 47-nji Prezidenti saýlanar. Dalaşgärlerden Donald Tramp ABŞ-nyň 45-nji Prezidentidir. Donald Tramp prezidentlige saýlanan saýlawlarynda ýene-de zenan dalaşgär – Hillari Klinton bilen bäsleşipdi. Bu gezekki bäsdeşi Kamala Harrisdir.
Prezident saýlawlary bilen bir hatarda Senatyň we Wekiller palatasynyň hem saýlawlary geçiriler, käbir ştatlarda gubernator saýlawlary geçiriler.
Täze saýlanan Prezidenti 2025-nji ýylyň 20-nji ýanwarynda wezipesine girişer.