Özbegistanyň paýtagty Daşkent şäherinde her ýyl dünýäniň dürli künjeklerinden kinorežissýorlary, aktýordyr aktrisalary bir ýere jemleýän “Ýüpek ýolunyň merjeni” atly halkara film festiwalynyň nobatdakysyna işjeň taýýarlyk görülýär.
XVI Daşkent halkara “Ýüpek ýolunyň merjeni” atly halkara film festiwalynyň çäklerinde geçiriljek bäsleşige 60 döwletden 400-e ýakyn film gatnaşmaga isleg bildirdi.
Şeýle hem bu festiwalyň çäklerinde ilkinji gezek TÜRKSOÝ-a agza döwletleriň animasiýa kinolaryn bagyşlanan forum geçiriler.
Şu ýyl dünýä belli hindi aktýory Raj Kapuryň doglan gününe 100 ýyl dolýar. Şonuň üçin bu gezekki Daşkent festiwalynda Raj Kapuryň döredijiliginiň hormatyna ýörite maksatnama düzüler. Ol Hindistanyň Özbegistandaky ilçihanasy bilen bilelikde gurnalyp, oňa meşhur hindi aktýorynyň neslinden bolan Ranbir Kapuryň hem-de Karina Kapuryň gatnaşmagyna garaşylýar.
Şeýle hem festiwalda golaýda aradan çykan fransuz aktýor Alen Delonyň iň gowy filmlerine we döredijiligine bagyşlanan döredijilik agşamyny guramak göz öňünde tutulýar.
Kinofestiwala meşhur režissýorlar we kino sungatynyň ägirtleri – Majid Majidi, Alekseý German-kiçisi, Awtandil Maharadze, Hema Malini ýaly sungat işgärleri çagyrylar we olaryň gatnaşmagynda halypa-şägirt sapaklaryny guramak meýilleşdirilýär.