Astana iş sapary amala aşyrýan hormatly Prezidentimiz Serdar Berdimuhamedow Merkezi Aziýanyň döwlet Baştutanlarynyň altynjy Konsultatiw duşuşygynyň çäklerinde Gazagystanyň Prezidenti Kasym Žomart-Tokaýew bilen duşuşdy. Bu barada Gazagystanyň Prezidentiniň metbugat gullugy habar berýär.
– Gazak-türkmen gatnaşyklary strategik hyzmatdaşlyk derejesine laýyklykda üstünlikli ösdürilýär. Size iki ýurduň arasyndaky köptaraplaýyn döwletara gatnaşyklaryna berýän goldawyňyz üçin hoşallyk bildirýärin. Ykdysady hyzmatdaşlygymyz ösdürilýär. Hökümetlerimiz özara söwdanyň möçberini 1 milliard dollara ýetirmek ugrunda iş alyp barýar. Biziň ýurtlarymyzda ähli mümkinçilikler bar. Energetika, senagat, ulag, logistika we beýleki pudaklarda durmuşa geçirilmegi göz öňünde tutulýan taslamalar bar – diýip, Gazak Lideri belläp geçdi.
Türkmenistanyň Prezidenti hem öz gezeginde myhmansöýerlik üçin minnetdarlyk bildirip, iki ýurduň arasyndaky hyzmatdaşlygyň okgunly ösüşine kanagatlanma bildirdi.
– Tükrmenistan Gazagystan bilen gatnaşyklarynyň ösdürilmegine uly üns berýär. Syýasy dialog işjeň ösdürilýär, söwda-ykdysady we medeni-ynsanperwer gatnaşyklar pugtalanýar. Hormatly Kasym-Žomart Kemelewiç, biz Sizi güýzde Türkmenistana resmi sapar hem-de Magtymguly Pyragynyň doglan gününiň 300 ýyllygy mynasybetli halkara foruma gatnaşmak üçin gelmegiňize garaşýarys – diýip, Türkmenistanyň Prezidenti belläp geçdi.
Duşuşygyň barşynda söwda-ykdysady, energetika, nebitgaz, ulag we logistika ulgamyndaky hyzmatdaşlygyň geljekki ugurlary ara alnyp maslahatlaşyldy. Medeni-ynsanperwer gatnaşyklaryň giňeldilmegi ugurlaryna aýratyn üns berildi.