Şu gün Türkmenistanyň Prezidenti Serdar Berdimuhamedow Gyrgyz Respublikasynyň Çolpon-Ata şäherinde geçirilýän Merkezi Aziýanyň döwlet Baştutanlarynyň 4-nji Konsultatiw duşuşygyna gatnaşdy.
Şeýle hem ýokary derejeli duşuşyga Gyrgyz Respublikasynyň Prezidenti Sadyr Žaparow, Gazagystan Respublikasynyň Prezidenti Kasym-Žomart Tokaýew, Täjigistan Respublikasynyň Prezidenti Emomali Rahmon hem-de Özbegistan Respublikasynyň Prezidenti Şawkat Mirziýoýew gatnaşdylar.
Sammitiň ahyrynda Gyrgyz Respublikasynyň Prezidenti tarapyndan resmi kabul edişlik guraldy we onda teatrlaşdyrylan oýunlar hem-de konsert maksatnamasy göz öňünde tutuldy.
SAMMITIŇ NETIJELERI WE GAZANYLAN YLALAŞYKLAR:
Merkezi Aziýanyň döwlet Baştutanlarynyň 4-nji Konsultatiw duşuşygynda sebit hyzmatdaşlygyny ösdürmäge degişli ençeme meseleler ara alnyp maslahatlaşyldy.
Duşuşyga gatnaşan döwlet Baştutanlary çykyş edip, azyk howpsuzlygyny üpjün etmek, söwda gatnaşyklaryny pugtalandyrmak we artdyrmak, ulag-logistika pudagyndaky hyzmatdaşlygy işjeňleşdirmek babatda ençeme teklipleri beýan etdiler.
- 2018-nji ýylda ýola goýlan Merkezi Aziýanyň döwlet Baştutanlarynyň Konsultatiw duşuşygy sebit hyzmatdaşlygynyň ösdürilmegi üçin möhüm meýdança öwrüldi.
- Içerki sebit söwda hyzmatdaşlygyny ösdürmegiň möhümdigi bellenildi. Geçen ýyl bu haryt dolanyşygy 27 göterim, 8 milliard dollara deň boldy.
- Gazagystan 5 ýylda Merkezi Aziýa bilen haryt dolanyşygyny 42 göterim artdyryp, 6,3 milliard dollara ýetirdi. Bu görkezijini 15 milliard dollara ýetirmek göz öňünde tutulýar.
- Serhetlerde söwda nokatlaryny döretmek teklip edildi.
- Elektron söwda ulgamyndaky hyzmatdaşlygy ösdürmek meýilleşdirildi. Harytlaryň elektron söwdasyny giňeltmegiň maksadalaýyk boljakdygy bellenildi.
- Daşky gurşawy goramak, ekologiýa abadançylygy we “ýaşyl” ykdysadyýet ugurlaryna üns berildi.
- Sebit teleýaýlymyny ýa-da internet habar saýtyny döretmek teklip edildi.
- Her ýyl Merkezi Aziýanyň medeni şäherini saýlamagy ýola goýmak başlangyjy öňe sürüldi.
- Merkezi Aziýanyň sebitleriniň forumyny döretmek teklip edildi.
- Hindistanyň, Pakistanyň we Hytaýyň bazarlaryna çykmak üçin alternatiw ulag geçelgelerini döretmek başlangyjy beýan edildi.
- Merkezi Aziýa döwletlerinde Merkezi Aziýanyň medeniýet, sunagt we kino festiwalyny guramak teklip edildi.
- Syýahatçylyk babatda bilelikdäki syýahatçylyk ugurlaryny döretmegiň maksadalaýyk boljakdygy bellenildi.
Merkezi Aziýa ýurtlarynyň sammiti: gol çekilen ylalaşyklar