Fransiýanyň paýtagty Pariž şäheri futbol baýramçylygyna taýýarlanýar. Ýewropa yklymynyň iň uly kubogyny gazanmak ugrundaky ýaryşyň final duşuşygy geçiriler. UEFA-nyň Çempionlar ligasynyň finalynda Ispaniýanyň “Real Madrid” topary bilen Angliýanyň “Liwerpul” topary duşuşar.
Ýewropanyň iň möhüm futbol duşuşygy 28-nji maýdan 29-njy maýa geçilýän gije, şenbe güni ýarygijede, Aşgabat wagty bilen 00:00-da başlar.
Ilkbaşda, bu final duşuşygyny Russiýanyň Sankt-Peterburg şäherinde geçirmek göz öňünde tutulypdy.
Ýöne soňra bu duşuşygy Fransiýanyň paýtagty Pariž şäherindäki “Stad de Frans” stadionynda geçirmek kararyna gelindi.
Bukmekerler bu futbol duşuşygynda Ýurgen Kloppyň ýolbaşçylygyndaky “Liwerpul” toparynyň ýeňiş gazanmagyna garaşýarlar.
Bu iki topar ikinji gezek Çempionlar ligasynyň finalynda duşuşýar. 2018-nji ýylyň finalynda “Real Madrid” topary “Liwerpuly” 3:1 hasabynda ýeňipdi. Şol duşuşykda “Liwerpulyň” müsürli ýyldyzy Mohamed Salah oýnuň birinji ýarymynda Serhio Ramosyň ýykmagynda şikes alyp, gözýaşlary bilen meýdançany terk etmeli bolupdy.
Finala çenli “Liwerpul” 12 oýnuň 10-synda ýeňiş gazandy. 1 gezek utulan “Liwerpul” 1 sapar hem deňme-deň oýnady (30-13 gol). “Real Madrid” 12 oýunda 2-is goşmaça wagtda 8 gezek ýeňiş gazandy. 4 gezek hem ýeňlişe sezewar boldy (28-14 gol).