Düýn Daşkent şäherinde geçirilen agyr atletika boýunça dünýä çempionatynda ilkinji çempion belli boldy. Erkekleriň arasynda 55 kilograma çenli agram derejesinde gazagystanly Arli Çonteý iki görnüşiň jemi boýunça 260 kilogramlyk netije bilen dünýäniň çempiony bolmagy başardy.
Ikinji orny 256 kilogramlyk netije bilen tailandly Zada Sambun-uan eýeledi. Hormat münberiniň üçünji basgançagyna bolgariýaly Andreý Rusew çykmagy başardy. Ol ştangany götermegiň iki görnüşiniň netijesi boýunça 254 kilogramlyk sepgide ýetip bildi.
Aşgabatda bürünç medal gazanypdy
Dünýä çempiony Arli Çonteýiň ady türkmenistanly janköýerlere hem tanyşdyr. Ol 2018-nji ýylda Aşgabatda geçirilen dünýä çempionyny bürünç medal bilen tamamlapdy. 29 ýaşly agyr atletikaçy bu gezek karýerasynda ilkinji ýola dünýä çempiony bolmagy başardy.
Mundan başga-da, Arli Çonteý şu ýyl Daşkentde geçirilen Aziýanyň çempionatynda altyn medala hem mynasyp boldy. Ol 2017-nji ýylda Taýbeýde geçirilen Tomusky Uniwersiadanyň hem bürnç medalynyň eýesidir.
Çempionlyk nähili gazanyldy?
55 kilograma çenli agram derejesinde ştangany silterläp götermekde altyn medala saud arabystanly türgen Mansur Al-Salem mynasyp boldy. Ol birbada 118 kilogram agyrlygy eýgerdi. Gazagystanly agyr atletikaçy Arli Çonteý hem şol agyrlygy eýgerdi, ýöne eminler oňa ikinji orny berdiler. Silterläp götermekde hormat münberiniň üçünji basgançagyna türkiýeli Muammer Şahin çykdy. Ol 116 kilogram agyrlygy göterdi.
Itekläp götermekde altyn medaly 144 kilogram bilen bolgariýaly agyr atletikaçy Angel Rusew eýeledi. Ondan 2 kilogram agyrlygy az göteren malaýziýaly Mohamad Anik Kasdan bu görnüşde kümüş medalyň eýesi boldy. Üçünji orny bolsa 142 kilogram bilen gazagystanly Arli Çonteý eýeledi.
Türkmen agyr atletikaçylarynyň dünýä çempionatyndaky çykyşlary başlanýar