Asla wagt ýitirmän, düzümini güýçlendirmek isleýän Angliýanyň «Nýukasl» topary ýanwar aýyna sabyrsyzlyk bilen garaşýar.
Saud Arabystanyna degişli bir maýagoýum kompaniýasy tarapyndan satyn alnan klub özgertmeleri baş tälimçi Eddi How bilen başlady. Dogry, topar häzir garaşylýan netijäni görkezip bilenok, ýöne Taýnsaýd şäheriniň janköýerleri täze geljek transferler bilen bu garaňkylygyň gündizlige öwrüljekdigine bil baglaýarlar.
Klubyň ýolbaşçylygynyň şu möwsüm üçin öňünde goýan maksady aşaky liga düşmezlik. Geljek ýylda bolsa «Nýukasl» öňdebaryjylaryň arasynda bolmagy niýetleýär. «Marca» neşiri klubyň ilkinji bäşş transfer maksady bilen bagly maglumatlary paýlaşdy. Ine, olar:
Toni Kroos
Nemes ýyldyz sanawda transferi iň kyn düşjek wekil hökmünde görülýär. Ýöne «Nýukasl» Kroosy özüne çekip biljek teklipleri bermäge taýýar.
Ýeri gelende aýtsak, Kroosyň «Real» bilen ýene bir möwsümlik şertnamasy bar. Öňräk bolsa ol karýerasyny Madrid şäheriniň toparynda tamamlajakdygyny aýdypdy. Eger Messi ýaly «Barselona» bilen berk baglanyşykly ýyldyzyň hem topardan aýrylandygyndan çen tutsak, «Nýukaslyň» bu maksadynyň başa barmajakdygyny aýdyp bolmaz.
Niklas Süle
Goragdaky kynçylyklardan halas bolmak isleýän «Nýukaslyň» bu bölege ilkinji maksady «Bawariýanyň» nemes goragçysy.
Soňky oýunlarda ýaş futbolçy Tanguý Nianzou «Bawariýada» Sülä per berenok. Şonuň üçin ätiýaçda oturmaly bolýan Süle hem, onuň topary hem «Nýukaslyň» tekliplerine göz ýummasa gerek.
Donny Wan de Bik
«Mançester Ýunaýtedde» Sulşeriň gereginden hem artyk tankytlanmagyna sebäp bolan oýunçylaryň biri hem Wan de Bik.
Norwegiýaly tälimçiniň ätiýaçlyk oturgyjyndan turuzmak niderland futbolçysy bu ýagdaýdan nägile. Şonuň üçin hem ol mümkinçilikleri başga toparlardan gözlemek isleýär.
«Mançester Ýunaýted» ony «Aýaksdan» 40 million ýewro satyn alypdy. Topar «Nýukasldan» hem şonçarak pul talap edip biler.
Jessi Lingard
Bu-da «gyzyl şeýtanlarda» gadyry bilinmeýän futbolçylaryň biri. Sulşer geçen tomusda 28 ýaşly futbolçynyň «West Heme» transfer edilmegine garşy çykypdy. Ýöne ol bu möwsümde bary-ýogy 160 minut futbol oýnap bildi.
Lingardyň 2022-nji ýylda dünýä çempionatyna gatnaşmak höwesi ýanwar aýynda «Nýukasla» geçmegine esasy sebäp bolup biler.
Tiron Mings
Mings öň «Bornmutda» How bilen işleşipdi. Oňa şol ýyllarda meýdana girmek üçin kän bir mümkinçilik berilmedik hem bolsa, «Aston Willadaky» oýny bilen kämilleşendigine göz ýumup bolmaz.
Onsoň hem ol APL-de goragçy bolmagyň jogapkärçilgine gowy düşünýär. Şeýlelikde, Mings «Nýukaslyň» häzirlikçe agsaýan goragyna şypa bolup biler.