Şu gün — 2-nji iýunda paýtagtymyzyň gür bagy-bossanlyga bürenip oturan gözel künjeginde ýerleşýän Çagalar we ýetginjekler köşgünde mekdep okuwçylaryny Gökderedäki çagalar sagaldyş merkezlerine ugratmagyň däbe öwrülen ajaýyp dabarasy boldy. Ir säherden aýdym-saza beslenen dabara dynç alşa ugradyljak çagalar we olaryň hossarlary, köp sanly myhmanlar, köpçülikleýin habar beriş serişdeleriniň wekilleri gatnaşdylar. Bu barada “Nesil” gazeti habar berýär.
Bu ýerde körpe nesilleriň ýerine ýetirmeginde ýaňlanan şirin owazlar, çagalar folklor we tans toparlarynyň çykyşlary ýakymly pursatlary döretdi. Ertekileriň meşhur gahrymanlarynyň hem bu dabara gatnaşyp, çagalaryň şatlygyny paýlaşmagy körpe myhmanlarda ýatdan çykmajak täsirleri galdyrdy.
Çagalar we ýetginjekler köşgüniň giň howlusynda guralan sergi hem özboluşlylygy bilen tapawutlandy. Şekillendiriş sungatynyň, nakgaşçylyk işleriniň sergisinde görkezilen her bir sungat eserinde bagtyýar çagalygyň ýurduna öwrülen eziz Diýarymyzyň ösüşleriniň aýdyň şöhlelenmesini görmek bolýar.
Ajaýyp dabaralardan soň, «Gökderäniň aýdymyny» dillerine sena edinen körpe nesillerimiz bagtly çagalygyň mekanyna sary ýola rowana boldular. Paýtagtymyzdan hem-de welaýatlardan gelen çagalar baýramçylyk äheňinde bezelen awtobuslarda tomusky başdan geçirmelere tarap ugradylar.
Bilşimiz ýaly, Gökdere jülgesi jana şypaly arassa howasy, tebigat gözellikleri bilen aýratyn tapawutlanýar. Gojaman daglar, towlanyp akýan çeşme-çaýlar, salkyn jülge behişdi mekana öwrülen bu ýerde welaýatlarymyzdan we paýtagtymyzdan gelen mekdep okuwçylary we körpeler özleriniň iň bir gyzykly, ýatdagalyjy, şadyýan pursatlaryny başdan geçirerler.
Olaryň oňaýly dynç almaklary üçin Gökderede «Nesil», «Altyn sümmül», «Altyn damja», «Altyn ýyldyz», «Nebitçi», «Ýaşlyk», «Demirýolçy», «Çeşme» ýaly onlarça çagalar sagaldyş we dynç alyş merkezleri hereket edýär. Bu ýerdäki ýokary hilli enjamlar bilen üpjün edilen sport zallarynda, kompýuter we dynç alyş otaglarynda, kitaphanalarda, sport meýdançalarynda körpe nesiller wagtlaryny şadyýan geçirerler.
Şu gün — 2-nji iýunda Türkmenistandaky çagalar sagaldyş merkezleriniň ählisinde tomusky dynç alyş möwsümi badalga aldy. Gökderede hem-de welaýatlarda ýerleşýän dynç alyş merkezleri dynç alýan ilkinji ýaş nesilleri kabul etdi.