Türkiýäniň Stambul şäherinde geçirilen Türki dilli döwletleriň hyzmatdaşlyk geňeşiniň (Türki Geňeş) VIII sammitiniň çäklerinde Türkmenistanyň Prezidenti Gurbanguly Berdimuhamedow bilen Gyrgyz Respublikasynyň Prezidenti Sadyr Žaparowyň arasynda ikiçäk duşuşyk geçirildi.
Gyrgyz Respublikasynyň Prezidentiniň metbugat gullugynyň habar bermegine görä, duşuşygyň dowamynda döwlet Baştutanlary söwda we ykdysady gatnaşyklar, energiýa pudagyndaky hyzmatdaşlyk we ş.m. ýaly ikitaraplaýyn hyzmatdaşlygyň köp sanly meselesini ara alyp maslahatlaşdylar.
Sadyr Žaparow şu ýyl Gyrgyzystan-Türkmenistan ikitaraplaýyn gatnaşyklarynyň görnetin ýokarlanmagyny kanagatlanma bilen belläp, ýokary derejedäki gepleşikleriň barşynda gazanylan ylalaşyklaryň öz wagtynda durmuşa geçiriljekdigine ynam bildirdi.
Şeýle hem Gyrgyz Respublikasynyň Prezidenti söwda we ykdysady hyzmatdaşlyk, iki döwletiň arasyndaky söwdany diwersifikasiýa etmek meselelerine aýratyn üns berdi we özara söwdany ösdürmekde uly mümkinçilikleriň bardygyny belläp geçdi.
Prezident Sadyr Žaparow Gyrgyzystanyň ikitaraplaýyn hyzmatdaşlygy mundan beýläk-de güýçlendirmek we ösdürmek, şeýle hem halkara guramalarynyň çäklerinde özara gatnaşyklary ösdürmek üçin ähli çäreleri görmäge taýýardygyny tassyklady.
Hormatly Prezidentimiz hem öz gezeginde ikitaraplaýyn hyzmatdaşlygyň okgunly ösüşine kanagatlanma bildirip, Gyrgyzystan bilen hem ikitaraplaýyn hem-de köptaraplaýyn görnüşde hyzmatdaşlygy ösdürmäge gyzyklanma bildirýändiklerini belledi.
Ozal hem habar berşimiz ýaly, hormatly Prezidentimiz Türki geňeşiň sammitiniň çäklerinde Türkiýe Respublikasynyň Prezidenti Rejep Taýyp Ärdogan bilen hem ikiçäk gepleşikler geçirdi.