Türkmenistanyň Prezidenti Serdar Berdimuhamedow ýurdumyza täze bellenen Italiýa Respublikasynyň Adatdan daşary we Doly ygtyýarly ilçisi Luiji Ferrarini, Katar Döwletiniň Adatdan daşary we Doly ygtyýarly ilçisi Hamad bin Raşid bin Hamad Al Azbini hem-de Gyrgyz Respublikasynyň Adatdan daşary we Doly ygtyýarly ilçisi Azizbek Madmarowy kabul etdi. Olar döwlet Baştutanymyza ynanç hatlaryny gowşurdylar.
Duşuşygyň dowamynda döwlet Baştutanymyz we diplomatlar hyzmatdaşlygyň köpugurly mümkinçiliklerini nazara alyp, ikitaraplaýyn gatnaşyklaryň geljekki ugurlary boýunça pikir alyşdylar. Bellenilişi ýaly, söwda-ykdysady ulgamda, üstaşyr-ulag düzümlerinde, energetika, oba hojalygy ýaly pudaklarda, maýa goýum taslamalaryny durmuşa geçirmekde, ylym we bilim, medeniýet, sport, syýahatçylyk ugurlarynda ikitaraplaýyn hyzmatdaşlyk ugurlar ara alnyp maslahatlaşyldy.
Ýangyç-energetika toplumy, söwda, maýa goýumlar, ulag we aragatnaşyk, himiýa, dokma senagaty, oba hojalyk pudagy, saglygy goraýyş hem-de ýokary tehnologiýalar ulgamlary hyzmatdaşlygyň geljegi uly ugurlarynyň hatarynda kesgitlenildi. Duşuşygyň dowamynda döwletara gatnaşyklaryň wajyp ugry hasaplanýan medeni-ynsanperwer hyzmatdaşlygy ösdürmegiň möhümdigi nygtaldy.