Türkmenistan bilen Koreýa Respublikasynyň arasynda diplomatik gatnaşyklaryň ýola goýulmagyna 31 ýyl doldy. Türkmen-koreýa dostlukly gatnaşyklaryna, özara bähbitli hyzmatdaşlygyna giň ýol açan bu sene mynasybetli, Türkmenistanyň Koreýa Respublikasyndaky Adatdan daşary we Doly ygtyýarly Ilçisi B.Durdyýew bilen bu ýurduň “The Korea Post” atly halkara žurnalynyň Baş redaktory Li Kýung-şikiň arasynda söhbetdeşlik boldy.
Ilçi B.Durdyýew iki ýurduň Prezidentleriniň ýolbaşçylygynda alnyp barylýan syýasy-diplomatik, söwda-ykdysady we medeni-ynsanperwer ulgamlardaky gatnaşyklar barada gürrüň berdi. Şeýle hem Türkmenistanyň Halk Maslahatynyň Başlygy, türkmen halkynyň Milli Lideri Gurbanguly Berdimuhamedowyň Koreýa Respublikasyna amala aşyran resmi saparynyň dowamynda gazanylan ylalaşyklar hem-de oňyn netijeler türkmen-koreý hyzmatdaşlygyny ösdürmek üçin uly binýat boldy diýip türkmen diplomaty belledi.
Söhbetdeşligiň dowamynda, Ilçi B.Durdyýew «ýaşyl» şäher we «akylly» şäher ölçeglerine laýyklykda gurulýan binalaryň we desgalaryň gurluşyk işlerinde öňdebaryjy ýurtlaryň tehnologiýalaryň hem-de iň gowy tejribäniň işjeň ulanylmagy, şol sanda olaryň ekologik ýagdaýynyň, seýsmiki durnuklylygynyň hem-de ýaşaýjylar üçin howpsuz şertleri döredilen Ahal welaýatynyň Arkadag şäheri barada giňişleýin gürrüň berdi.