Awstriýa Respublikasynyň Türkmenistandaky Adatdan daşary we Doly ygtyýarly Ilçisi Tomas Şuler-Götzburgyň ýolbaşçylygyndaky wekiliýet Türkmenistana saparynyň çäklerinde Türkmenistanyň Söwda-senagat edarasynda kabul edildi. Bu ýerde Türkmenistanyň ministrlikleriniň we pudaklaýyn dolandyryş edaralarynyň wekilleri bilen ikitaraplaýyn duşuşyklar gurnaldy.
Duşuşyklar 2025-nji ýylyň 4-nji noýabrynda geçirilip, olarda ulag we logistika, azyk senagaty, saglygy goraýyş, senagat önümçiligi, işewürligi ösdürmek ýaly möhüm ugurlar barada pikir alşyldy. Myhmanlar Türkmenistan bilen gatnaşyklaryň pugtalandyrylmagyna aýratyn ähmiýet berýändiklerini bellediler.
Geçirilen gepleşiklerde taraplar ykdysadyýetiň dürli ugurlaryndaky hyzmatdaşlyk gatnaşyklaryny ara alyp maslahatlaşdylar.
Ilçi Tomas Şuler-Götzburgyň ýolbaşçylygyndaky wekiliýet Türkmenistanyň Awstriýa Respublikasy bilen netijeli hyzmatdaşlyk edýändigini kanagatlanma bilen nygtap, saglygy goraýyş, bilim, medeniýet we söwda-ykdysady ugurlar boýunça ikitaraplaýyn gatnaşyklary mundan beýläk-de ösdürmegiň möhüm ähmiýete eýedigini belledi.
Duşuşyklaryň ahyrynda iki dostlukly ýurduň arasyndaky ynama esaslanýan netijeli gatnaşyklaryň yzygiderli ösdüriljekdigine ynam bildirildi.