Türkmenistanyň Senagatçylar we telekeçiler birleşmesi we BMG-niň ýurtdaky wekilhanasy Bilelikdäki hereketleriň meýilnamasyna gol çekdiler. Resminama 2030-njy ýyla çenli döwür üçin Durnukly ösüş maksatlaryny durmuşa geçirmekde taraplaryň hyzmatdaşlygyny pugtalandyrmaga gönükdirilendir.
Hususy pudak Türkmenistanyň ykdysadyýetinde möhüm orun eýeleýär. Ol söwda, maliýe we maýa goýumlary pudaklarynda innowasiýalaryň hereketlendiriji güýji bolup durýar. Hususy pudagyň düzümi köpdürlüdir – ol iri korporasiýalardan başlap, hususy telekeçileri we olaryň birleşiklerini öz içine alýar.
Gol çekilen Hereketleriň meýilnamasy hususy pudagyň mümkinçiliklerini we BMG-niň tejribesini birleşdirmegi göz öňünde tutýar. Munuň özi Türkmenistanyň durnukly ösüşiniň bähbidine innowasion çözgütleri has işjeň ornaşdyrmaga mümkinçilik berer.