Aşgabada iş sapary bilen gelen Russiýa Federasiýasynyň Tatarystan Respublikasynyň Prezidenti Rustam Minnihanow Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow bilen duşuşdy.
Tatarystan Respublikasynyň Prezidentiniň metbugat gullugynyň habar bermegine görä, ikitaraplaýyn hyzmatdaşlyk gatnaşyklary boýunça pikir alşyldy.
Türkmenistanyň Kazan şäherinde açylan Baş konsullygynyň ikitaraplaýyn gatnaşyklary ösdürmäge täze itergi berendigi aýdyldy. Şeýle hem Tatarystanyň köp sanly kompaniýalarynyň Türkmenistanda iş alyp barýandygy bellenildi.
Türkmenistan bilen Tatarystanyň arasyndaky ynsanperwer ugurdaky gatnaşyklara hem orun berildi. Häzirki wagtda Türkmenistanyň ýaşlarynyň köp sanlysynyň Tatarystanyň ýokary okuw mekdeplerinde bilim alýandygy mälim edildi.
Tatarystan Respublikasynyň Prezidenti Rustam Minnihanow öz ýurdunyň kompaniýalarynyň Türkmenistanda nebit öndürmek, nebiti gaýtadan işlemek, maşyngurluşyk we beýleki ugurlarda iş alyp barýandygyny belledi.
Şeýle hem Minnihanow Tatarystanyň uniwersitetlerinde bilim alýan türkmen talyplarynyň sanynyň yzygiderli artýandygyny belläp, häzirki wagtda 6 müňden gowrak türkmen ýaşlarynyň bilim alýandygyny mälim etdi.