BMG-niň Ösüş maksatnamasynyň (BMGÖM) Türkmenistandaky hemişelik wekili Narine Saakýan Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bäş ýyllyk ýubileýi bilen gutlady. Ol öz çykyşynda ýurduň ýolbaşçylarynyň alyp barýan syýasaty netijesinde Türkmenistanda çagalaryň saglygynyň, biliminiň we parahat durmuşynyň üpjün edilýändigini belledi.
«Bu ýubileý — ýurduň we ýolbaşçylaryň ýaş nesliň geljegi barada nähili alada edýändiginiň aýdyň subutnamasydyr. Çagalaryň geljegine, sagdyn durmuşyna, bilimine we parahat durmuşyna maýa goýmak örän möhümdir. Türkmenistanda çagalarda munuň hemmesi Hormatly Prezidentiň we türkmen halkynyň Milli Lideriniň saýasynda bardyr» diýip, «Neýtralnyý Türkmenistan» gazetine beren interwýusynda BMG-niň Ösüş maksatnamasynyň (BMGÖM) Türkmenistandaky hemişelik wekili Narine Saakýan belläp geçdi.
Gaznanyň döredilmeginiň bäş ýyllygy mynasybetli dabaralar Arkadag şäheriniň merkezi meýdançasynda geçirildi. Sylaglamak dabarasynda ýurtda akkreditirlenen halkara guramalaryň wekillerine «Arkadag» medaly gowşuryldy. Türkmenistanyň Prezidentiniň Permanyna laýyklykda, bu sylaga Narine Saakýan, şeýle hem BMG-niň Çagalar gaznasynyň (ÝUNISEF) Türkmenistandaky wekili Jalpa Ratna mynasyp boldular.
Saakýan bu sylagy tutuş BMGÖM toparynyň goşandynyň ykrarlanmagy hökmünde kabul etdi. «Muny diňe bir şahsy sylagym däl-de, eýsem BMG-niň Ösüş maksatnamasynyň tutuş toparynyň sylagy hökmünde kabul edýärin. Biz Türkmenistanda 30 ýyldan gowrak wagt bäri işleýäris we ýurduň hökümeti bilen bilelikdäki işlerimizi dowam etdirmegi maksat edinýäris» diýip, ol nygtady.
BMG-niň wekili çagalaryň bähbidine alnyp barylýan bilelikdäki işiň möhümdigini hem belledi. «Her kim öz işini bitirende, çagalaryň ýagty geljege bolan ynamyny berkitjek oňyn netijeleri alarys. Şu günki waka Türkmenistanyň ynsanperwerlik ýörelgelerine ygrarlydygyny aýdyň görkezýär» diýip, Saakýan aýtdy.