5-nji noýabrda futbol boýunça Türkmenistanyň kubogy ugrundaky ýaryşyň çärýek final duşuşyklary geçirildi. Olarda «Nebitçi» bilen «Altyn asyr», «Aşgabat» bilen «Ahal», «Merw» bilen «Şagadam», «Energetik» bilen bolsa «Köpetdag» duşuşdy.
«Nebitçi» ― «Altyn asyr»: çempiony jerime urgular halas etdi
Çempionatda şowsuz çykyş edýän häzirki çempion Kubok ýaryşy bilen hem çärýek finalda hoşlaşyp bilerdi. Çünki duşuşygyň esasy wagty deňlik bilen tamamlandy. Hernä «Altyn asyry» 11 metrlik jerime urgularyndaky şowlulyk halas etdi.
«Aragatnaşykçylar» 12-nji minutda Begmyrat Baýowyň geçiren goly bilen öňe saýlanan hem bolsalar, bu üstünligi 14 minut gorap bildiler. 26-njy minutda Süleýman Derýaýew «Nebitçä» deňlik getiren goly geçirdi.
Birinji ýarymy 1:1 hasabynda deňlik bilen tamamlanan duşuşygyň 68-nji minudynda Myrat Annaýew baş emin Arslan Goşşanowyň bellän 11 metrlik jerime urgusyndan dürs peýdalanyp, hasaby «aragatnaşykçylaryň» peýdasyna 2:1-e çykardy. Janköýerler duşuşygyň şu hasapda tamamlanmagyna garaşyp otyrka, soňky sekuntlarda «Altyn asyryň» derwezesine hem 11 metrlik jerime urgusy bellenildi. Bu urgyny goşmaça wagtyň 5-nji minudynda «Nebitçiniň» kapitany Azat Garajaýew dürs ýerine ýetirdi. Şeýlelikde, duşuşygyň ykbaly 11 metrlik urgularyna bagly boldy.
Bu urgular 4:3 hasabynda «Altyn asyryň» üstünligi bilen tamamlandy. Bu netije bilen Türkmenistanyň at gazanan tälimçisi Ýazguly Hojageldiýewiň şägirtleri Kubok ýaryşynyň ýarym finalyna çykmagy başardylar.
Duşuşukda dört oýunça sary duýduryş kartynyň görkezilmegi, 72-nji minutda «Nebitçiniň» goragçysy Akmyrat Jumanazarowyň ikinji sary kartdan soň oýundan çykarylmagy dartgynlylygyň güýçli bolandygyndan habar berýär.
«Aşgabat» ― «Ahal»: Arslanmyrat Amanowyň goşa goly
Şu gün Aşgabadyň «Nisa» stadionynda futbol boýunça Türkmenistanyň kubogy ugrundaky ýaryşyň çärýek final duşuşygy geçirildi. Bu ýerde «Aşgabat» bilen «Ahal» ýarym finala çykmak üçin güýç synanyşdylar.
Birnäçe ýyldan soňra şu möwsümiň bosagasynda ýene-de ýurdumyza dolanan tejribeli futbolçy Arslanmyrat Amanowyň aýratyn tapawutlanan duşuşygynda «Ahal» «Aşgabady» 2:1 hasabynda ýeňdi. Ýeňiji toparyň gollarynyň ikisini hem Arslanmyrat Amanow geçirdi. Has takygy, ol 29-njy minutda 11 metrlik jerime urgusyndan, soňra 50-nji minutda oýun pursatynda tapawutlandy. «Aşgabadyň» goluny bolsa 56-njy minutda Röwşen Baýlyýew geçirdi.
Şeýlelikde, Türkmenistanyň çempionatynyň öňdebaryjysy Kubok ýaryşyna hem üstünlikli girişdi.
Örän dartgynly geçen duşuşykda baş emin Babanzar Haknazarow «Aşgabatdan» dört, «Altyn asyrdan» iki oýunça sary duýduryş kartyny görkezdi.
«Merw» ― «Şagadam»: Marydan Türkmenbaşa ýeňişli dolanyş
Futbol boýunça Türkmenistanyň kubogynyň Mary şäherindäki 10 müň orunlyk sport toplumynda geçirilen duşuşygynda ýerli «Merw» Türkmenbaşy şäheriniň «Şagadamyny» kabul etdi. Biýdan-başa myhman toparyň üstünligi bilen geçen duşuşykda «Şagadam» 3:1 hasabynda ýeňiş gazandy.
Kenarýaka şäheriň toparyndan 22-nji minutda Baýramgeldi Nurlyýew 11 metrlik jerime urgusyndan dürs peýdalanyp hasaby açan bolsa, 31-nji minutda Kerim Hojaberdiýew hasaby 2:0-a çykardy. «Şagadamyň» üçünji pökgüsini bolsa 66-njy minutda Resul Mahudow geçirdi.
Duşuşykda «Merwiň» ýeke-täk goluny 79-njy minutda Serdaraly Ataýew geçirdi. Şeýlelikde, «Şagadam» 3:1 hasabyndaky ýeňiş bilen Kubok ýaryşynyň ýarym finalyna çykdy.
«Energetik» ― «Köpetdag»: jerimeden gazanylan ýarym final
Türkmenistanyň futbol Kubogynyň çärýäk finalyndaky ýeňijisi 11 metrlik jerime urgularynyň netijesinde kesgitlenen ikinji bir duşuşyk «Energetik» bilen «Köpetdagyň» arasynda bolup geçdi. Mary şäherindäki «Energetik» stadionynda geçirilen duşuşygyň esasy wagty 1:1 hasabyndaky deňlik bilen tamamlandy.
Has takygy, myhman toparyň futbolçysy Yhlas Saparmämmedowyň 71-nji minutda geçiren goluna ýer eýeleri 86-njy minutda Muhammet Işangulyýewiň goly bilen 86-njy minutda jogap berdiler.
Şeýlelikde, duşuşygyň netijesi 11 metrlik jerime urgularynyň netijesinde kesgitlenildi. Bu urgularda 4:3 hasabynda öňe saýlanaan «Köpetdag» ýaryşyň ýarym finalyna adyny ýazdyrmagy başardy.
Dartgynly geçen duşuşykda emin Resul Mämmedow jemi 10 futbolça sary duýduryş kartyny görkezmeli boldy.
Ýarym final jübütleri
Geçirilen çärýek final duşuşyklaryndan soňra, ýarym finalyň jübütleri hem mälim boldy. Ine, olar:
«Altyn asyr» ― «Ahal»;
«Şagadam» ― «Köpetdag».
Kubok ýaryşynyň ýarym final duşuşyklary 7-nji dekabrda geçiriler. Kubogyň eýesi bolsa 22-nji dekabrda geçiriljek final duşuşygyndan soň belli bolar. Täze ýyl baýramynyň öňüsyrasyndaky bu duşuşykda ýeňiş bolan topar Kubokdan daşary 2022-nji ýylda AFK-nyň kubogy ugrundaky ýaryşa gatnaşmaga bolan hukugy hem gazanar.
6-njy noýabr ýyldyzlar näme diýýär? Gündelik Täleýnama