Ozal hem habar berşimiz ýaly, Ýewropa Bileleşiginiň daşary işler we howpsuzlyk syýasaty boýunça ýokary wekili, Ýewropa Komissiýasynyň wise-prezidenti Kaýa Kallas Türkmenistanyň paýtagty Aşgabatda saparda boldy.
Ol bu saparynyň çäklerinde “Merkezi Aziýa — Ýewropa Bileleşigi” formatyndaky 20-nji ministrler duşuşygyna gatnaşdy we birnäçe möhüm ikiçäk duşuşyklar geçirdi.
Şeýle hem Kaýa Kallas saparynyň jemleri boýunça ýerli we daşary ýurtly köpçülikleýin habar beriş serişdeleriniň wekilleriniň gatnaşmagynda metbugat brifingini geçirdi.
Ýewropa Komissiýasynyň wise-prezidenti Kaýa Kallas Türkmenistana amala aşyran sapary barada özüniň “X” (ozalky “Twitter”) jemgyýetçilik torundan şeýle diýýär:
– Türkmenistana özüniň ajaýyp paýtagtynda “Merkezi Aziýa — Ýewropa Bileleşigi” ministrler duşuşygy üçin myhman alandygy üçin minnetdarlyk bildirýärin. Biz geljek hepde geçiriljek ilkinji “Merkezi Aziýa — Ýewropa Bileleşigi” sammitine taýýarlyk görmek üçin köp sanly möhüm ugurlary ara alyp maslahatlaşdyk.
Biz Ýewropa Bileleşigi bilen Merkezi Aziýanyň arasynda hyzmatdaşlykda täze sahypany açýarys.