Halkara futbol federasiýasynyň (FIFA) prezidenti Janni Infantino 18-nji dekabrda, çarşenbe güni Kataryň paýtagty Dohada Türkmenistanyň Futbol federasiýasynyň başlygy Guwançmuhammet Öwekow bilen duşuşdy.
Duşuşykda FIFA-nyň prezidenti Türkmenistanda sportuň dürli görnüşleri bilen birlikde futboluň hem ösdürilýändigine ýokary baha berdi. Türkmenistanda futboly ösdürmekde TFF-niň saldamly işleri alyp barýandygy bellenildi.
“Türkmenistanyň Futbol federasiýasynyň wekiliýeti bilen geçiren duşuşygymyzda Türkmenistanda futbolyny ösdürmekde we gelejekde ýerine ýetiriljek işlerde FIFA-nyň nähili goldaw berip biljekdigi babatynda maslahat geçirdik” diýlip, bu barada FIFA-nyň prezidenti Janni Infantinonyň “Instagram” sahypasynda beýan edildi.
Ýeri gelende bellesek, söhbetdeşlikde ikitaraplaýyn hyzmatdaşlygyň dowamynda çagalar hem-de ýaşlar futboluny ösdürmekde, tälimçilik okuwy babatynda tejribe alyşmakda hyzmatdaşlygy ýola goýmak barada gürrüň edildi.
Futbol hünärmeni Guwançmuhammet Öwekow Türkmenistanyň Futbol federasiýasynyň başlygy wezipesine şu ýylyň 4-nji noýabrynda saýlanandygyny ýatladýarys.