Hindistan Respublikasynyň paýtagty Täze-Deli şäherinde Howpsuzlyk geňeşiniň sekretarlarynyň owgan meseleleri boýunça köptaraplaýyn geňeşmeleri geçirildi. Hindistanyň Premýer-ministriniň milli howpsuzlyk boýunça geňeşçisi Adjit Dowalyň baştutanlygynda geçirilýän Owganystandaky howpsuzlyk boýunça sebit dialogyna Hindistanyň, Eýranyň, Gazagystanyň, Gyrgyz Respublikasynyň, Russiýanyň, Täjigistanyň, Türkmenistanyň hem-de Özbegistanyň wekilleri gatnaşdylar.
Hindistanyň Premýer-ministriniň metbugat gullugynyň hem habar bermegine görä, bu sebit duşuşygyna Türkmenistan döwletimizden Ministrler Kabinetiniň Başlygynyň orunbasary, Döwlet howpsuzlyk geňeşiniň sekretary Ç.Amanow gatnaşdy.
Hindistanyň Premýer-ministri Narendra Modi bu dialoga gatnaşan döwletleriň howpsuzlyk geňeşiniň sekretarlary bilen duşuşdy.
Owganystan boýunça sebit dialogynyň duşuşygynda taraplar Owganystandaky ýüze çykýan ýagdaýy, esasanam howpsuzlyk we beýleki meseleleri ara alyp maslahatlaşdylar. Taraplar Owganystandaky häzirki syýasy we ynsanperwerlik ýagdaýy, şeýle hem ýurtda howpsuzlygyň üphün edilmegine degişli meseleler boýunça pikir alyşdylar.
Geňeşmeleriň barşynda oňa gatnaşyjylar Owganystanda durnuklylygyň hem-de howpsuzlygyň üpjün edilmegine goldaw bermäge taýýaryklaryny ýene-de bir gezek nygtadylar.