Ýewropa Bileleşiginiň Türkmenistandaky wekiliýeti Türkmenistanyň Bedenterbiýe we sport baradaky döwlet komiteti hem-de Aşgabat şäher häkimligi bilen hyzmatdaşlykda Aşgabatda “Parahatçylyk we ynanyşmak marafonuny” üstünlikli geçirdi. Türkmenistanda Ýewropa güni 2025 baýramçylygynyň çäklerinde geçirilen bu şowhunly çärä 500-den gowrak dürli ýaşdaky raýatlar gatnaşyp, dabaraly we hemmeleri birleşdirýän ruhubelent gurşawy döretdiler.
Marafon Türkmenistanyň başlangyjy bilen BMG-niň Baş Assambleýasy tarapyndan 2024-nji ýylyň mart aýynda yglan edilen “Halkara parahatçylyk we ynanyşmak ýyly” bilen hem utgaşýar. Bu halkara ykrar edilen başlangyç halklaryň arasynda parahatçylykly gatnaşyklary pugtalandyrmagyň we ynamyň ähmiýetini belläp geçýär. “Parahatçylyk we ynanyşmak marafony” bu gymmatlyklary dolulygyna şöhlelendirip, sporty arkaly adamlary birleşdirdi, sagdyn we işjeň durmuş ýörelgesini wagyz etdi hem-de agzybirlik ruhuny ösdürdi.
Ýewropa Bileleşigi üçin sport diňe bir fiziki işjeňlik bolman, halklaryň arasyndaky gatnaşyklara köpri gurýan we umumy gymmatlyklary öňe sürýän güýçli guraldyr. Sport tertipliligi, toparlaýyn işlemegi, hormat goýmagy we dözümli bolmagy öwredýär — bu bolsa parahatçylykly bilelikde ýaşamak üçin zerur häsiýetlerdir. Şeýle çäreler sportuň dürli pikirli we medeniýetli adamlary umumy maksatlar ugrunda birleşdirip bilýändigini görkezýär. Ýewropa Bileleşigi sporty jemgyýetiň sagdyn fiziki we ruhy taýdan ösüşiniň özeninde goýýar.
Çäräniň giň gatnaşygy üpjün etmek maksady bilen üç görnüşli ylgaw bäsleşigi geçirildi: 6 ýaşdan ýokary çagalar we maşgalalar üçin 2 km, 5 km ylgawy we has çylşyrymly 10 km ylgawy. Ugurlar paýtagtymyzyň merkezi we nyşanly ýerleriniň biri bolan Garaşsyzlyk seýilgähi boýunça aýlanyp, gatnaşyjylar üçin sazlaşykly we owadan ugurlar üpjün edildi.
Ylgawlardan başga-da, baýramçylyk ruhuny artdyrmak üçin giňişleýin çäreler geçirildi. Bu çäreleriň hatarynda çagalar we maşgalalar üçin gyzykly bäsleşikler, aýdym-saz çykyşlary boldy. Munuň özi çärä aýratyn şowhunly we şatlykly görnüş berdi hem-de ony ähli gatnaşyjylar üçin ýatdan çykmajak waka öwürdi.
“Parahatçylyk we ynanyşmak marafony” Ýewropa Bileleşigi bilen Türkmenistanyň arasyndaky berk hyzmatdaşlygyň aýdyň mysaly bolup durýar. Ol umumy gymmatlyklary we parahatçylyk, sagdynlyk hem-de jemgyýetçilik agzybirligi ýaly umumy maksatlara ygrarlylygy dabaralandyrdy.