Angliýanyň “Premýer Liga” futbol çempionaty tamamlandy. Düýn çempionatda jemleýji 38-nji tapgyryň duşuşyklary geçirildi. Şol duşuşyklarda “Mançester Ýunaýted” öz öýünde “Fulham” toparyny 2:1 hasabynda utdy, “Çelsi” topary öz meýdançasynda “Nýukasl” bilen 1:1 hasabynda deňme-deň oýnady, çempionatda ikinji orny eýelän “Arsenal” topary “Wulwerhempton” toparyny 5:0 hasabynda ýeňdi, çempionatyň çempiony “Mançester Siti” topary “Brentford” toparyndan 1:0 hasabynda utuldy.
Çempionatyň netijesine görä, “Mançester Siti”, “Arsenal”, “Mançester Ýunaýted” we “Nýukasl” Çempionlar ligasynda oýnar. “Liwerpul” bilen “Braýton” Ýewropa ligasynda çykyş eder. “Aston Willa” Konferenasiýa ligasynda Angliýa wekilçilik eder.
Amerikaly işewüriň ýolbaşçylygyndaky “Çelsi” topary 12-nji orny eýeläp, soňky 29 ýylda iň pes görkezijä eýe boldy.
2015-16-njy möwsümde Angliýanyň çempiony bolup, köpleri haýran galdyran “Lester” we “Lids” toparlary ikinji liga düşdi.
Çempion bolan “Mançester Siti” toparynyň düzümindäki norwegiýaly ýaş futbolçy Erling Holand 35 duşuşykda 36 gol geçiren çempionatyň iň köp gol geçiren futbolçysy boldy.