Angliýanyň ýygyndysy 2026-njy ýylyň dünýä çempionatynyň üçünji ýeri ugrundaky duşuşygynda Fransiýanyň toparyny 6:4 hasabynda utdy. Bu ýeňiş arkaly iňlisler dünýä çempionatlarynda 60 ýyldan soňra ilkinji gezek ilkinji üçlüge girmegi başardylar. Angliýanyň milli ýygyndysy 1966-njy ýyldan bäri ilkinji gezek futbol boýunça dünýä çempionatynda iň güýçli üç toparyň arasyna girdi.
60 ýyl mundan ozal iňlisler öz öýlerinde geçirilen çempionatda ýeňiji bolupdylar.
ABŞ-da, Kanadada we Meksikada geçirilen ýaryşyň üçünji ýeri ugrundaky oýunda Angliýanyň topary fransuzlary 6:4 hasabynda ýeňdi. Duşuşyk Maýamide geçirildi.
Angliýanyň düzüminde gollary Deklan Raýs (3-nji minut), Ezri Konsa (18), Bukaýo Saka (37, 45+1, 87) we Jud Bellingem (90+8) geçirdiler.
Utulan topardan bolsa Kilian Mbappe (48, 66), Bredli Barkolýa (54) we Usman Dembele (90+6) tapawutlandylar.
Angliýanyň we Fransiýanyň ýygyndylary dünýä çempionatlarynyň taryhynda üçünji ýer ugrundaky iň köp pökgi geçirilen duşuşygy oýnadylar. Mundan ozal, 1958-nji ýylda şeýle duşuşykda fransuzlar Germaniýanyň (GFR) toparyny uly hasap bilen utupdylar (6:3).
Iňlis futbolçylary taryhda 2-nji gezek dünýä çempionatynda baýrakly orna mynasyp boldular. 1966-njy ýylda Angliýa dünýä çempiony boldy.
Fransuzlar dünýäniň iki gezekki çempionydyr (1998, 2018). Topar şeýle-de iki gezek kümüş (2006, 2022) we iki gezek bürünç (1958, 1986) medallary eýeledi.