Watan goragçylarynyň gününiň öňüsyrasynda Türkmenabat şäherinde ýene-de 24 maşgala täze jaýlaryň açarlaryny alyp, bu baýramy täze öýde garşylamak bagtyna eýe boldular. Olaryň ählisi Türkmenistanyň Adalat ministrliginiň Lebap welaýat bölüminiň işgärleridir.
“Türkmenistan” gazetiniň habaryna görä, ýaşaýyş jaýyň gurluşygyny Türkmenistanyň Senagatçylar we telekeçiler birleşmesiniň agzasy bolan «Röwşen çyragy» hususy kärhanasynyň gurluşykçylary alyp bardylar. Baş inžener Bahadur Rahmedowyň gürrüň berşi ýaly, bu bina şu hususy kärhana ynanylan ilkinji ýaşaýyş jaýydyr. Şonuň üçin gurluşykçylar ony uly jogapkärçilik bilen bina etdiler. Binada otaglardaky amatlyklardan başga-da, suw, tebigy gaz, elektrik toguny geçiriş we lagym ulgamlary döwrüň ösen talaplaryna laýyklykda gurnalypdyr.
Şäherde migrasiýa, prokuratura we içeri işler edaralarynyň işgärleri üçin gurlan döwrebap ýaşaýyş jaýlaryny-da açyp ulanmaga bermek meýilleşdirilýär. Şeýlelikde, Watan goragçylarynyň gününi gündogar sebitiň harby gullukçylarynyň we hukuk goraýjy işgärleriniň 100-den gowragynyň maşgalasy täze jaýlarda garşylar.