ABŞ-nyň Raýatlyk we Immigrasiýa Gullugy (USCIS) resmi taýdan habar bermegine görä, 2027-nji maliýe ýyly (FY 2027) üçin H-1B iş wizasy boýunça başlangyç hasaba alyş döwri 2026-njy ýylyň 4-nji martynda başlar we 19-njy marta çenli dowam eder.
USCIS-niň maglumatyna görä, hasaba alyş döwri 4-nji martda gündogar wagty bilen sagat 12:00-da açylyp, 19-njy martda sagat 12:00-da tamamlanar. Bu döwürde H-1B wizasyna tabyn bolan iş berijiler we olaryň wekilleri her bir dalaşgäri USCIS-niň onlaýn hasaby arkaly elektron görnüşde hasaba almaly we her hasaba alyş üçin 215 dollar möçberinde töleg tölemeli bolarlar.
H-1B wizasy boýunça ýüz tutýan, emma entek USCIS onlaýn hasaby bolmadyk iş berijiler guramaçylyk hasabyny döretmeli. Wekiller kompaniýa müşderilerini öz hasaplaryna öňünden goşup bilerler, ýöne dalaşgärleriň maglumatlaryny girizmek we töleg geçirmek diňe 4-nji martdan soň mümkin bolar.
USCIS saýlama işleriniň hasaba alyş döwri tamamlanandan soň geçiriljekdigini we 2026-njy ýylyň 31-nji martyna çenli saýlanan ýüz tutmalar boýunça bildirişleriň USCIS onlaýn hasaplary arkaly iberiljekdigini mälim etdi. Diňe saýlanan dalaşgärler boýunça iş berijilere H-1B wiza ýüz tutmasyny resmileşdirmäge rugsat berilýär.
FY 2027 üçin täze düzgün: agramly (weighted) saýlama ulgamy
USCIS-niň bellemegine görä, Içeri Howpsuzlyk Departamenti (DHS) H-1B wizalarynyň saýlanyş tertibini üýtgedýän täze düzgüni kabul etdi. Täze düzgün boýunça has ýokary hünärli we has ýokary aýlykly işgärlere ileri tutulýar. Maksat — amerikan işgärleriniň aýlygyny, iş şertlerini we iş mümkinçiliklerini goramak.
Eger hasaba alyş döwründe H-1B wiza çäginden köp dalaşgär hasaba alynsa, USCIS agramly saýlama usulyny ulanar. Eger dalaşgärleriň sany çäkden az bolsa, ähli degişli hasaba alyşlar saýlanan hasaplanylar.
Prezidentiň täze kararnamasy we mümkin bolan goşmaça töleg
USCIS şeýle hem 2025-nji ýylyň 19-njy sentýabrynda Prezident Donald Trump tarapyndan gol çekilen “Käbir wagtlaýyn iş wizalarynyň girizilmegini çäklendirmek” baradaky Kararnama barada ýatlatdy. Bu Kararnama elektron hasaba alyş tapgyryna göni täsir etmese-de, eger iş beriji H-1B saýlamasynda ýeňiji bolup, ýüz tutmaga hukugy gazansa, wizany resmileşdirmek üçin goşmaça 100 müň dollar töleg tölemeli bolup biler.
Bu mesele boýunça giňişleýin maglumat USCIS-niň H-1B Specialty Occupations sahypasynda ýerleşdirilýär.
📌 Çeşme: U.S. Citizenship and Immigration Services (USCIS)