Türkiýäniň «Beşiktaş» topary müsürli hüjümçi Mohamed Salahy transfer etmek ugrunda alyp barýan işini dowam etdirýär we ýakyn wagtda bu geleşigi tamamlamaga umyt baglaýar. Bu barada türk neşirleri habar berýär.
Ozal türk kluby futbolçy bilen deslapky ylalaşyga gelipdi, emma oýunçynyň wekilleri goşmaça talaplary öňe sürensoň, transferiň resmileşdirilmegi gijä galdy.
«Beşiktaş» toparynyň ýolbaşçysy Serdal Adalym Salah üçin başda hödürlenen 12 million ýewrolyk teklibi artdyrmak islemeýär. Klub müsürli futbolçynyň wekilleriniň aşa ýokary maliýe talaplaryny kabul etmejekdigini mälim etdi. Şeýle-de bolsa, taraplaryň arasyndaky gepleşikler dowam edýär. Çeşmäniň maglumatyna görä, soňky iki günüň dowamynda geleşige gatnaşyjylaryň arasynda işjeň aragatnaşyk alnyp barylýar we ylalaşyga gelinmegi ähtimal.
Salahyň wekilleriniň klubyň ýolbaşçylary bilen duşuşmak üçin ýene-de Stambula gelmegine garaşylýar. Şeýle hem futbolçynyň aýalynyň Stambulda ýaşamaga gyzyklanma bildirýändigi we onuň kararyna täsir edýändigi habar berilýär.
Bellenilişi ýaly, Salahyň özünde şahsy şertnama şertleri boýunça hiç hili mesele ýok. Eger onuň wekilleri öň ylalaşylan maliýe şertlerine dolansa, transfer tamamlanar.
«Beşiktaşyň» meýilnamasy geleşigi ertirden gijä galman tamamlamak we penşenbe güni «Tüpraş» stadionynda «Midtjylland» bilen geçiriljek oýundan öň Salahy janköýerlere tanyşdyrmakdyr. Şonuň üçin oýunçynyň agenti Rami Abbas bilen boljak duşuşyk aýgytly ähmiýete eýe bolup biler.
«Liwerpul» Salahy 2017-nji ýylda «Roma» klubundan 42 million ýewro töweregi möçberde transfer edipdi.