Azerbaýjanyň Kärdeşler Arkalaşyklary Konfederasiýasynyň (AHİK), Türkmenistanyň Kärdeşler Arkalaşyklarynyň Milli merkeziniň (TKAMM) we Halkara Zähmet Guramasynyň (HZG) Işçileriň işi baradaky býurosynyň (ILO-ACTRAV) bilelikde guramagynda “Howanyň üýtgemegi boýunça kärdeşler arkalaşyklarynyň işi” atly maslahat geçirildi.
Baku şäherinde guralan çärä resmi ýolbaşçylar, Milli Mejlisiň deputatlary, hökümete degişli bolmadyk we jemgyýetçilik guramalarynyň wekilleri, Azerbaýjanyň we Türkmenistanyň kärdeşler arkalaşyklarynyň, HZG-nyň hem-de Yslam Hyzmatdaşlyk Guramasynyň (YHG) wekilleri gatnaşdylar.
Maslahatda çykyş eden Azerbaýjan Respublikasynyň Prezidentiniň howa meseleleri boýunça wekili Muhtar Babaýew maslahatyň ähmiýetini belledi, ählumumy howanyň üýtgemeleri we onuň netijeleri, Azerbaýjanyň howanyň üýtgemegi boýunça syýasaty barada durup geçdi, “ýaşyl geçiş” we daşky gurşawy goramak ugrunda amala aşyrylýan çäreler barada gürrüň berdi.
Konfederasiýanyň başlygy Sahib Mämedow öz çykyşynda Azerbaýjanyň ählumumy howanyň üýtgemegi işine goşant goşýan ýurtlaryň hataryndadygyny we jenap Prezident Ilham Alyýewiň ýolbaşçylygynda bu ugurda maksatlaýyn hem-de ulgamlaýyn çäreleriň amala aşyrylýandygyny aýtdy.
Türkmenistanyň Kärdeşler Arkalaşyklarynyň Milli merkeziniň başlygy hanym Oguljennet Berdiliýewa ählumumy howanyň üýtgemegi şertlerinde bu ýaly halkara platformalaryň tejribe alyşmak we bilelikdäki çemeleşmeleri kemala getirmek nukdaýnazaryndan uly ähmiýete eýedigini belledi.
Onuň bellemegine görä, häzirki şertlerde kärdeşler arkalaşyklary zähmet bazaryndaky üýtgeşmelere has çalt uýgunlaşmaly we işgärleriň durmuş goraglylygyny güýçlendirmek bilen bagly meselelere täsirini artdyrmalydyr.
Soňra “Howanyň üýtgemegi we zähmet dünýäsi” mowzugynda panel ara alyp maslahatlaşmalary geçirildi. Çäräniň dowamynda AHİK tarapyndan soňky ýyllarda kärdeşler arkalaşyklary ulgamynda amala aşyrylan özgertmeleri we durmuşa ornaşdyrylan innowasion täzelikleri görkezýän wideofilm görkezildi.