Orta geçelge boýunça sanlylaşdyrma, ýük daşamalarynyň ösdürilmegi we geçelgäniň ýagdaýyny seljermek meselelerini öz içine alýan teswirnama gol çekildi.
«Report» neşiri «Azerbaýjan Demirýollary» ÝGP-e salgylanyp habar bermegine görä, Türkmenistanyň paýtagty Aşgabat şäherinde «Azerbaýjan Demirýollary» ÝGP-niň başlygy Röwşen Rüstemow, Türkmenistanyň demirýol ulag ministri Mämmet Akmämmedow, «Özbegistan demirýollary» paýdarlar jemgyýetiniň dolandyryş geňeşiniň başlygy Zufar Narzullaýew we «Gruziýa demirýollary» paýdarlar jemgyýetiniň baş direktory Laşa Abaşidze gatnaşmagynda dört taraplaýyn duşuşyk geçirildi.
Duşuşykda sebitiň esasy üstaşyr ugurlarynyň biri bolan Orta geçelgäniň çäginde hem, demirýol ulgamy boýunça hyzmatdaşlygy giňeltmegiň mümkinçilikleri ara alnyp maslahatlaşyldy.
Şeýle hem Orta geçelgäniň bäsdeşlige ukyplylygyny ýokarlandyrmak, bu ugur boýunça daşalýan ýükleriň möçberini artdyrmak baradaky meseleler boýunça pikir alşyldy; ýük daşamalarynyň has çalt amala aşyrylmagy nukdaýnazaryndan operasiýalaryň sanlylaşdyrylmagynyň ähmiýeti aýratyn nygtaldy.
Geçen ýylyň awgust aýynda Türkmenbaşy şäherinde Azerbaýjan Respublikasynyň Sanly ösüş we ulag ministrligi, Türkmenistanyň demirýol ulag ministrligi hem-de Özbegistan Respublikasynyň ulag ministrligi arasynda ulag-logistika hyzmatdaşlygy babatda gol çekilen Özara düşünişmek hakynda Ähtnamanyň hyzmatdaşlygy giňeltmäge möhüm goşant goşýandygy hem bellenildi.
Dört taraplaýyn duşuşygyň jemleri boýunça teswirnama gol çekildi.