Halkara futbol federasiýasy (FIFA) ýylyň jemleri boýunça täze baýragyň döredilýändigini özüniň resmi saýtynda habar berdi.
Degişli ylalaşyk Dubaýyň sport geňeşi bilen bilelikde gazanyldy. Ol 2026-njy ýyldan başlap güýje girer we FIFA-nyň ýylyň dowamynda meýdançada hem-de meýdançanyň daşynda iň gowy oýunçylary sylaglaýan ýeke-täk her ýylky baýragy bolar.
“Biz dünýä derejesinde futboly ösdürmek üçin futbol bilen ýaşaýan we şondan dem alýan Dubaý şäheri bilen tagallalarymyzy birleşdirýändigimize şatdyrys. Bu dünýä futbol baýraklary diňe bir sylaglaýyş dabarasy bolman, eýsem futbolyň täsirini bellemek hem-de ýylyň resmi iň gowy oýunçylaryna meýdançada we onuň daşynda hormat goýmak üçin innowasion usul bolar” diýip, FIFA-nyň prezidenti Janni Infantino aýtdy.
Mundan ozal FIFA 2016-njy ýylda esaslandyrylan “The Best FIFA Football Awards” baýragyny gowşuryp gelýärdi. Iň soňky baýrak gowşurylyş dabarasy dekabr aýynyň ortalarynda Dohada geçirildi. Geçen möwsümiň iň gowy oýunçysy diýlip, Fransiýanyň “Pari Sen-Žermen” toparynyň hüjümçisi Usman Dembele ykrar edildi.