Türkmen küştçüsi Lala Şöhradowa Hindistanyň Mumbaý şäherinde geçirilýän 20 ýaşa çenli ýaş gyzlaryň arasyndaky Aziýa çempionatynda üstünlikli çykyş edýär. Bäsleşige Aziýa yklymynyň iň güýçli ýaş küştçi gyzlary — Hindistandan, Gazagystandan, Maldiw adalaryndan, Nepaldan, Şri-Lankadan, Türkmenistandan we Özbegistandan türgenler gatnaşýarlar.
Rapid ýaryşyna jemi 60 küştçi gatnaşdy. Türkmenistana dört türgen wekillik edýär: Jahan Rejepowa, Mähri Agamuradowa, Leýla Şöhradowa we Lala Şöhradowa.
Ýagşygeldi Kakaýew adyndaky Halkara nebit we gaz uniwersitetiniň talyby Lala Şöhradowa (reýtingi 2181) çalt küşt boýunça geçirilen ýaryşda ynamly ýeňiş gazandy. Ýedinji tapgyryň netijesi boýunça ol mümkin bolan 7 utukdan 6 utuk toplap, birinji orny eýeledi.
Ýaryşyň öňdeliginiň tertibi:
-
Lala Şöhradowa (Türkmenistan) — 6 utuk
-
Pratiti Bordoloi (Hindistan) — 6 utuk
-
Prişita Gupta (Hindistan) — 5 utuk
Altyn medala barýan ýol aňsat düşmedi. Üçünji tapgyrda Türkmenistanyň ýygyndy toparyndaky ildeşi, WFM Jahan Rejepowadan utulandan soň, Lala öz häsiýetini görkezip, ýokary derejeli oýun görkezmegi başardy. Ol galan tapgyrlaryň ählisinde ýeňiş gazanyp, birinji orna çykdy.