Ýewropanyň paýtagty Brýussel şäherinde Türkmenistanyň Hemişelik Bitaraplygynyň 30 ýyllygyna hem-de Halkara parahatçylyk we ynanyşmak ýylyna bagyşlanan dabaraly çäre geçirildi. Bu kabul edişligi Türkmenistanyň Belgiýa Patyşalygyndaky Ilçihanasy gurnady. Oňa Ýewropa institutlarynyň ýolbaşçylary, Belgiýanyň hökümet wekilleri, halkara guramalarynyň işgärleri, ilçiler, diplomatlar, jemgyýetçilik işgärleri hem-de medeniýet edaralaryň wekilleri gatnaşdy.
Çäräniň açylyş dabarasy Türkmenistanyň, Belgiýa Patyşalygynyň we Ýewropa Bileleşiginiň döwlet seneleriniň ýerine ýetirilmegi bilen başlandy. Bu pursat hormatyň, dostlugyň we açyklygyň nyşany boldy.
Esasy çykyş bilen Türkmenistanyň Ilçisi Sapar Pälwanow çykyş etdi. Ol üç onýyllygyň dowamynda bitaraplygyň garaşsyz türkmen döwletiniň berk binýadyna, şeýle hem sebitiň parahatçylygyny we durnuklylygyny pugtalandyrýan möhüm gurala öwrülendigini belledi. Ilçi Türkmenistanyň dünýäde bitaraplyk syýasaty BMG-niň Baş Assambleýasy tarapyndan Kararnama arkaly ykrar edilen we Konstitusiýasynda berkidilen ýeke-täk ýurt bolup durýandygyny aýtdy.
Ol öz çykyşynda Türkmenistanyň bitaraplygynyň Türkmenistan tarapyndan parahatçylyk başlangyçlaryna goşantlaryň, Merkezi Aziýada durnuklylygyň pugtalandyrylmagyna hem-de Owganystanda möhüm taslamalaryň durmuşa geçirilmegine nukdaýnazardan ähmiýetlidigini belledi. Şolaryň arasynda TOPH we TOP ýaly taslamalar uzak möhletleýin parahatçylyga hem-de sebitleriň ykdysady arabaglanyşygyna goşant hökmünde garalýar.
Ilçi bitaraplygyň Türkmenistanyň daşary syýasatynyň esasy ugrydygyny nygtady. Ol Ýewropa bilen Merkezi we Günorta Aziýanyň arasynda täze hyzmatdaşlyk köprülerini gurmaga mümkinçilik berýändigini aýtdy.
Agşamyň hormatlanan myhmanlarynyň biri Ykdysadyýet we parahatçylyk Institutyň (Institute for Economics and Peace) Ýewropa we Ýakyn Gündogar ofisiniň direktory Serj Strubans boldy. Bu institut parahatçylyk, durnuklylyk we ykdysady prosesleriň howpsuzlyga täsirleri ýaly faktorlary öwrenýän öňdebaryjy ylmy merkezleriň biridir.
Ol çykyşynda durnuklylyga gönükdirilen maýa goýumlarynyň ähmiýetini belläp, parahatçylygyň anyk ykdysady we jemgyýetçilik çözgütleri arkaly döredilýändigini aýtdy. Şeýle hem TOPH we TOP ýaly taslamalaryň jemgyýetçilik ösüşine, uzak möhletleýin durnuklylyga, şeýle-de sebitiň döwletleriniň arasyndaky arabaglanyşygy güýçlendirmäge ýardam edýändigini nygtady.
Agşamyň iň täsirli we garaşylmadyk pursatlarynyň biri bolsa “Miss Belgiýanyň” finalçylarynyň çykyşy boldy. Gyzlar ilkinji gezek häzirki zaman türkmen milli egin-eşiklerinde sahna çykdylar. Bu bolsa Türkmenistanyň medeniýetine hormatyň we halklaryň arasyndaky dostlugyň ýyly nyşanyna öwrüldi.
Dabaraly agşam diplomatik pikirleriň, hünärmenleriň garaýyşlarynyň, medeni gatnaşyklarynyň we ýaşlyk joşgunynyň ajaýyp utgaşmasyna öwrüldi. Çäre ýene bir gezek möhüm hakykaty tassyklady: parahatçylyk ynamdan başlanýar, ynam bolsa dialog, hormat we bilelikdäki döredijilik tagallasy arkaly gelýär.