Türkmenistanyň Mejlisi bilen Ýewropada Howpsuzlyk we Hyzmatdaşlyk Guramasynyň Parlament Assambleýasynyň bilelikde guramagynda geçirilen “Ýewropada Howpsuzlyk we Hyzmatdaşlyk Guramasynyň çäginde Parlament diplomatiýasy: Dialog – abadan we asuda geljek üçin hyzmatdaşlygy ýola goýmagyň guraly” atly maslahata gatnaşmaga gelen Özbegistan Respublikasynyň Oliý Mejlisiniň Kanunçylyk Palatasynynyň Başlygynyň orunbasary Rahim Hakimowyň ýolbaşçylygynda gelen parlament wekilleri bilen Türkmenistanyň Mejlisiniň Başlygynyň orunbasary Gahryman Rozyýewiň, türkmen-özbek parlamentara dostluk toparynyň başlygy Mejlisiň Ykdysady meseleler baradaky komitetiniň başlygy Guwançmyrat Agaýewiň we deputatlaryň gatnaşmagynda duşuşyk geçirildi.
Türkmenistan bilen Özbegistanyň arasynda strategik häsiýete eýe bolan syýasy, ykdysady, medeni, ynsanperwer, söwda, ulag, aragatnaşyk, nebit-gaz, energetika we beýleki ugurlardaky gatnaşyklary, hyzmatdaşlygy parlament diplomatiýasynyň üsti bilen goldamak hem-de geljekde bu ugurlardaky gatnaşyklary kämileşdirmek barada pikir alşyldy. Iki ýurduň döwlet baştutanlarynyň tagallalary netijesinde parlament diplomatiýasy täze hil derejä eýe bolandygy bellenildi.
Özbegistan Respublikasynyň Oliý Mejlisiniň Kanunçylyk Palatasynynyň Başlygynyň orunbasary duşuşygyň dowamynda geçirilýän halkara çärä uly baha berýändigini, Özbegistan döwletiniň hemişe Türkmenistan bilen dostlukly gatnaşyklary, işjeň hyzmatdaşlygy pugtalandyrmaga, Türkmenistanyň başlangyçlaryny yzygiderli goldamaga, aýratynam geçirilýän çärelere işjeň gatnaşmak bilen parlament diplomatiýasynyň üsti bilen goldamaga taýýardyklaryny nugtady.
Ol öz çykyşynda dünýäde çylşyrymly ýagdaýlaryň dowam edýän döwründe parahatçylygyň aýratyn ähmiýete eýedigini bellemek bilen, aýratynam Türkmenistanyň başlangyjy bilen “2025-nji ýyl – Halkara parahatçylyk we ynanyşmak ýyly” atly Kararnamanyň kabul edilmegi sebitde we dünýäde parahatçylygy, howpsuzlygy üpjün etmekde möhüm ähmiýetli başlangyçlary yzygiderli teklip edýändigini we goldanylýandygyny hem belledi.
Myhmanlar paýtagtymyz Aşgabat şäheriniň ak mermerli binagärlik aýratynlyklaryna haýran galandyklaryny bellemek bilen bildirilen myhmansöýerlik üçin sagbolsunlaryny aýtdylar. Geljekde parlamentara gatnaşyklary pugtalandyrmak we kanunçykaryjylyk işinde tejribe alyşmaga, parlamentara dostluk toparlarynyň işjeňligini, ugurdaş komitetleriň arasynda gatnaşyklary ýola goýmaga taýýardyklaryny bellediler.