4G tehnologiýasy bilen deňeşdirilen, maglumat geçirijiligi 10 esse çenli ýokary bolup, ygtybarly we durnukly birikmeleri üpjün edýän 5G tehnologiýasynyň aýratynlyklary öwrenilýär. Bu barada Ministrler Kabinetiniň ýanyndaky Ulag we kommunikasiýalar agentliginiň Baş direktory Mämmethan Çakyýew hasabat berdi.
“Watan” habarlar gepleşiginde bellenilip geçilişi ýaly, şunuň bilen baglylykda, döwlet Baştutanymyzyň garamagyna “Türkmenaragatnaşyk” agentliginiň bu ugurda degişli işleri geçirmek baradaky teklibi hödürlendi.
Hormatly Prezidentimiz häzirki wagtda daşary ýurtlarda döwrebap 5G tehnologiýasynyň giňden ulanylýandygyny belläp, bu teklibi goldaýandygy aýtdy. Döwlet Baştutanymyz agentligiň ýolbaşçysyna bu tehnologiýanyň mümkinçiliklerini we aýratynlyklaryny öwrenmek boýunça degişli işleri geçirmegi tabşyrdy.