Türkmenistanyň Prezidenti Serdar Berdimuhamedow “Merkezi Aziýa — Koreýa Respublikasy” 16-njy hyzmatdaşlyk forumyna gatnaşmak üçin paýtagtymyza gelen Täjigistan Respublikasynyň daşary işler ministri Sirojiddin Muhriddini, Özbegistan Respublikasynyň daşary işler ministri Bahtiýor Saidowy, Gyrgyz Respublikasynyň daşary işler ministri Žeenbek Kulubaýewi hem-de Gazagystan Respublikasynyň Premýer-ministriniň orunbasary, daşary işler ministri Murat Nurtleuwy kabul etdi.
Duşuşyklarda Türkmenistan bilen Merkezi Aziýa döwletleriniň arasyndaky hyzmatdaşlyk gatnaşyklarynyň giň toplumy ara alnyp maslahatlaşyldy.
Duşuşygyň dowamynda döwlet Baştutanymyz Ýewropada Howpsuzlyk we Hyzmatdaşlyk Guramasynyň Baş sekretary bilen Merkezi Aziýa döwletleriniň daşary syýasat edaralarynyň ýolbaşçylarynyň duşuşygynda ÝHHG bilen köpýyllyk hyzmatdaşlygyň ösdürilýändiginiň bellenendigini aýtdy. Bu gurama bilen hyzmatdaşlyk ýylsaýyn giňeldilýär we berkidilýär. Ol täze ugurlary öz içine alýar.
Şeýle hem “Merkezi Aziýa — Koreýa Respublikasy” 16-njy hyzmatdaşlyk forumynyň ähmiýetine aýratyn üns çekildi.
Duşuşygyň dowamynda söwda-ykdysady hyzmatdaşlygyň döwletara dialogyň möhüm ugry bolup durýandygyna üns çekildi. Şunuň bilen baglylykda, bu ulgamda ikitaraplaýyn hyzmatdaşlygy ösdürmek maksady bilen, ägirt uly kuwwaty açmak üçin mümkin bolan ähli gurallaryň doly peýdalanylmagynyň zerurdygy tassyklanyldy. Üstaşyr ulag gatnawlary ulgamynda hyzmatdaşlygy giňeltmek meseleleri aýratyn ara alnyp maslahatlaşyldy.
Mundan başga-da, hormatly Prezidentimiz Serdar Berdimuhamedow Koreýa Respublikasynyň daşary işler ministri Pak Çžini kabul etdi.