Katarda geçirilýän futbol boýunça dünýä çempionatynda ýene-de bir garaşylmadyk netije gazanyldy. “E” toparynda Germaniýa bilen Ýaponiýanyň milli ýygyndylarynyň duşuşygy geçirildi. Bu duşuşyk hem edil Argentina-Saud Arabystany duşuşygy ýaly boldy.
Duşuşygyň birinji ýarymynda Germaniýanyň ýygyndysy 11 metrlik jerime urgusyndan peýdalanyp, hasaby açdy we birinji ýarymy 1:0 hasabynda öňde tamamlandy. Germaniýadan Ilkaý Gündogan tapawutlandy.
Duşuşygyň ikinji ýarymynda bolsa, Ýaponiýanyň ýygyndysy has-da tijenip, janköýerleri sabyrsyzlandyrýan oýun görkezdi. Duşuşykda 8 minutda 2 gol geçiren Ýaponiýa Germaniýany 2:1 hasabynda utmagy başardy.
Ýaponiýanyň düzüminde 75-nji minitda Dona we 83-nji minutda Asano tapawutlandy.
Bu toparda çykyş edýän Ispaniýa bilen Kosta-Rika sagat 21:00-da duşuşar.
Germaniýanyň içeri işler ministri Nensi Fezer hem duşuşygy stadionda FIFA-nyň ýolbaşçysy Janni Infantino bilen bilelikde tomaşa etdi.
Germaniýa 2018-nji ýyldaky dünýä çempionatynda hem ilkinji duşuşygynda Meksikadan 1:0 hasabynda utulypdy.