Ýewropa Bileleşiginiň ýurtlarynda uly ýaşly ilatyň 46 göteriminiň azyndan bir doza möçberinde COVID-19 sanjymyny alandygy mälim edildi. Bu barada Ýewropa Bileleşiginiň komissiýasynyň ýolbaşçysy Ursulan fon der Lýaýen habar berdi.
Ol Brýusselde geçirilen ÝB-niň döwlet we hökümet baştutanlarynyň sammiti wagtynda jemgyýetçilik torundaky hasabyndan ÝB-niň çäklerinde alnyp barylýan sanjym işleri barada maglumat berdi. Ol takmynan 450 million ilatly ÝB-niň çäklerinde 300 million doza sanjymyň üpjün edilendigini, 245 million dozasynyň urlandygyny habar berdi. Şeýlelikde, uly ýaşly ilatyň 46 göterimi azyndan bir doza möçberinde sanjym alandygy mälim edildi.
Şu hepdäniň dowamynda bu görkezijiniň 50 göterime yetjekdigi aýdyldy. 2021-nji ýylyň birinji çärýeginde 106 million doza sanjym üpjün edildi. Ikinji çärýekde 413 million doza, üçünji çärýekde 529 million doza, dördünji çärýekde bolsa 452 million doza sanjymyň üpjün edilmegine garaşylýar.
Ýewropa Bileleşigi “BioNTech-Pfizer” bilen 2,4 milliard, “AstraZeneca” bilen 400 million, “Sanofi-GSK” bilen 300 million, “Johnson & Johnson” bilen 400 million, “CureVac” bilen 405 million, “Moderna” bilen 460 million doza möçberinde sanjym almak babatda şertnama baglaşdy.
Häzirki wagtda “BioNTech-Pfizer”, “Moderna”, “AstraZeneca” we “Johnson & Johnson” kompaniýalarynyň sanjymy ÝB tarapyndan bellige alyndy.
ÝB iýul aýyna çenli uly ýaşly ilatyň 70 göterimine sanjym etmegi meýilleşdirýär.