Daşary ýurtda bolýan raýatlarymyz üçin: Hasaba alynmak

Daşary ýurt döwletlerinde hemişelik ýaşaýan we wagtlaýyn bolýan Türkmenistanyň raýatlarynyň hukuklaryny we bähbitlerini üpjün etmek maksady bilen Türkmenistanyň Daşary işler ministriniň 2020-nji ýylyň 05-nji iýunynda çykaran 34-Ö belgili buýrugy bilen Daşary ýurt döwletlerinde hemişelik ýaşaýan we wagtlaýyn bolýan Türkmenistanyň raýatlaryny Türkmenistanyň daşary ýurt döwletlerindäki diplomatik wekilhanalary we konsullyk edaralary tarapyndan hasaba almagyň Tertibi tassyklanyldy. Türkmenistanyň Adalat ministrliginiň resmi web saýtynda neşir eden ýokary ady agzalan Buýrugy dolulygyna Size ýetirýäris!

Bellemeli zat, ýakynda Daşary ýurt döwletlerinde bolýan Türkmenistanyň raýatlarynyň özlerine bagly bolmadyk ýagdaýlaryň ýüze çykmagy sebäpli Türkmenistana dolanyp barmak üçin şahadatnamanyň hereket edýän möhleti 1 (bir) aýdan 6 (alty) aýa çenli uzaldyldy we “Atavatan Türkmenistan” halkara žurnalynyň www.atavatan-turkmenistan.com saýtynda bu baradaky habary daşary ýurtlarda bolýan raýatlarymyzyň dykgatyna ýetiripdik.

Daşary ýurt döwletlerinde hemişelik ýaşaýan we wagtlaýyn bolýan Türkmenistanyň raýatlaryny Türkmenistanyň daşary ýurt döwletlerindäki diplomatik wekilhanalary we konsullyk edaralary tarapyndan hasaba almagyň

TERTIBI

Şu Daşary ýurt döwletlerinde hemişelik ýaşaýan we wagtlaýyn bolýan Türkmenistanyň raýatlaryny Türkmenistanyň daşary ýurt döwletlerindäki diplomatik wekilhanalary we konsullyk edaralary tarapyndan hasaba almagyň Tertibi (mundan beýläk-Tertip) «Türkmenistanyň daşary ýurtlardaky konsullyk edaralary hakynda» Türkmenistanyň Kanunynyň 29-njy maddasyna laýyklykda taýýarlanyldy.

Şu Tertip daşary ýurt döwletlerinde hemişelik ýaşaýan we wagtlaýyn bolýan Türkmenistanyň raýatlaryny Türkmenistanyň daşary ýurt döwletlerindäki diplomatik wekilhanalary we konsullyk edaralary tarapyndan hasaba almagyň tertibini düzgünleşdirýär.

Türkmenistanyň daşary ýurt döwletlerindäki diplomatik wekilhanalary we konsullyk edaralary öz konsullyk çäginde ýerleşýän Türkmenistanyň raýatlaryny hasaba alýarlar.
Türkmenistanyň daşary ýurt döwletlerindäki diplomatik wekilhanalary we konsullyk edaralary (mundan beýläk – diplomatik wekilhana we konsullyk edarasy) daşary ýurt döwletlerinde hemişelik ýaşaýan we wagtlaýyn bolýan Türkmenistanyň raýatlarynyň (mundan beýläk – raýat) hukuklaryny we bähbitlerini üpjün etmek maksady bilen olaryň hasabyny ýöredýärler.
Hasaba almak raýatyň özüniň ýa-da onuň kanuny wekiliniň hasaba aldyrmak boýunça ýazan arzasynyň esasynda Türkmenistanyň diplomatik wekilhanasyna ýa-da konsullyk edarasyna ýüz tutmak arkaly tölegsiz esasda amala aşyrylýar.

Arzanyň ýanyna raýat tarapyndan doldurylan Daşary ýurt döwletlerinde hemişelik ýaşaýan we wagtlaýyn bolýan Türkmenistanyň raýatlaryny hasaba alyş ýazgysy (şu Tertibe goşundy) we şol raýatyň Türkmenistanyň raýatynyň Türkmenistandan gitmek we Türkmenistana gelmek üçin pasportynyň nusgasy goşulýar.

Türkmenistanyň raýatynyň Türkmenistandan gitmek we Türkmenistana gelmek üçin pasporty bolmadyk daşary ýurt döwletlerinde hemişelik ýaşaýan ýa-da wagtlaýyn bolýan raýatlar hasaba alnanda olaryň hasaba alyş ýazgysynyň ýanyna Türkmenistanyň raýatynyň pasportynyň, Türkmenistanyň diplomatik pasportynyň, Türkmenistanyň gulluk pasportynyň ýa-da Türkmenistanyň kanunçylygyna laýyklykda Türkmenistanyň raýatlygyny tassyklaýan resminamanyň haýsy hem bolsa biriniň nusgasy goşulyp bilner.
Raýaty hasaba almak diplomatik wekilhana we konsullyk edarasyna poçta aragatnaşygy, faksimil aragatnaşygy, elektron poçta arkaly raýatyň şu Tertibiň dördünji böleginde görkezilen resminamalary ibermegi esasynda, şeýle hem Internet torundaky resmi web-saýtynda raýatyň degişli maglumatlary elektron görnüşde doldurmagy esasynda amala aşyrylyp bilner.
Hasaba alyşdan soňra raýatyň hasaba alyş ýazgysynda görkezen maglumatlarynda üýtgeşmeler dörändigi barada raýatdan maglumat gelip gowşan halatynda, raýatyň hasaba alyş ýazgysyna goşmaça üýtgetmeler we bellikler girizilýär. Ozal girizilen ýazgylar ýok edilmeýär we raýaty hasaba alyş maglumatlarynda saklanylýar.
Raýatyň ýa-da onuň kanuny wekiliniň ýüz tutmagy esasynda diplomatik wekilhananyň ýa-da konsullyk edarasynyň konsullyk wezipeli adamy raýatyň hasaba alnandygy ýa-da hasapdan çykarylandygy barada erkin görnüşde düzülen kepilnamany tölegsiz esasda berýär.

Raýatyň hasaba alnandygy ýa-da hasapdan çykarylandygy barada Türkmenistanyň raýatynyň Türkmenistandan gitmek we Türkmenistana gelmek üçin pasportyna ýa-da Türkmenistanyň kanunçylygyna laýyklykda Türkmenistanyň raýatlygyny tassyklaýan beýleki resminamalaryň hiç birine ýazgylary ýazmak ýa-da bellikleri etmek gadagan edilýär.

Diplomatik wekilhananyň ýa-da konsullyk edarasynyň konsullyk wezipeli adamy hasaba almak boýunça gelip gowşan arzalary bellige alýar we hasaba alyş ýazgysynda görkezilen maglumatlary Türkmenistanyň diplomatik wekilhanasynda ýa-da konsullyk edarasynda hasapda duran raýatlaryň elektron binýadyna girizýär.

Diplomatik wekilhananyň ýa-da konsullyk edarasynyň konsullyk wezipeli adamy hasapda duran raýatlaryň elektron binýadyny hasaba alyş ýazgysynda görkezilen maglumatlara esaslanyp, raýatlary daşary ýurt döwletinde hemişelik ýaşaýan ýa-da wagtlaýyn bolýan toparlara bölüp ýöredýär.

Daşary ýurt döwletinde soňky iki ýyldan az bolmadyk möhletde hemişelik ýaşaýan raýat daşary ýurt döwletinde hemişelik ýaşaýan hökmünde hasaba alynýar.

Gulluk ýa-da okuw maksatlary bilen daşary ýurda giden we olaryň tamamlanmagyna çenli şol ýerde iki ýyldan artyk bolýan raýatlar şol döwletde wagtlaýyn bolýan hökmünde hasaba alynýar.

Daşary ýurt döwletinde üç aýdan iki ýyla çenli bolmagy meýilleşdirýän raýat daşary ýurt döwletinde wagtlaýyn bolýan hökmünde hasaba alynýar.
Daşary ýurt döwletlerinde hemişelik ýaşaýan ýa-da wagtlaýyn bolýan raýatlary diplomatik wekilhanalaryň we konsullyk edaralarynyň hasabyndan çykarmak üçin aşakda görkezilenleriň biri esas bolup durýar:

1) raýatyň özi ýa-da onuň kanuny wekili tarapyndan hasapdan çykmak boýunça erkin görnüşde düzülen arzanyň şu Tertibiň dördünji böleginde görkezilen usullar arkaly berilmegi;

2) raýatyň Türkmenistanyň beýleki bir diplomatik wekilhanasynda ýa-da konsullyk edarasynda hasaba alnandygy barada habarnamanyň gelip gowuşmagy;

3) raýatyň hasaba almak boýunça arzasynda görkezilen daşary ýurt döwletinde hemişelik ýaşamagy meýilleşdirýän döwrüniň tamamlanmagyndan dört ýylyň geçmegi;

4) raýatyň hasaba almak boýunça arzasynda görkezilen daşary ýurt döwletinde wagtlaýyn bolmagy meýilleşdirýän döwrüniň tamamlanmagyndan iki ýylyň geçmegi;

5) raýatyň aradan çykmagy;

6) raýaty nam-nyşansyz giden diýip ykrar etmek ýa-da ölen diýip yglan etmek hakynda kazyýetiň çözgüdiniň kanuny güýje girmegi;

7) Türkmenistanyň raýatlygynyň bes edilmegi.

Raýatyň hasapdan çykarylmagy bilen, diplomatik wekilhanada ýa-da konsullyk edarasynda hasapda duran raýatlaryň elektron binýadyndaky maglumatlara degişli bellik edilýär. Bellik özünde raýatyň hasapdan çykarylan senesini we onuň esaslandyrmasyny saklaýar.
Raýatyň daşary ýurt döwletindäki ýaşaýan ýeriniň hasaba alyşdan soňra üýtgän halatynda, raýatyň ýüz tutmagy esasynda, ol soňky ýaşaýan ýeriniň çägine degişli Türkmenistanyň diplomatik wekilhanasynda ýa-da konsullyk edarasynda hasaba alnyp bilner. Şeýle halatda, raýaty ozalky alnan hasapdan çykarmak işi soňky hasaba alnyşy amala aşyran Türkmenistanyň diplomatik wekilhanasy ýa-da konsullyk edarasy tarapyndan ýerine ýetirilýär.
Daşary ýurt döwletlerinde hemişelik ýaşan ýa-da wagtlaýyn bolan raýatlar Türkmenistana dolanyp geleninden soňra Türkmenistanyň Daşary işler ministrligine ýüz tutmak arkaly hasapdan çykarylyp bilner.
Şu Tertibiň on dördünji we on bäşinji böleklerinde görkezilen hasapdan çykarmak boýunça amallar ýerine ýetirilenden soňra, hasapdan çykaran tarap raýatyň ozal hasaba alnan Türkmenistanyň diplomatik wekilhanasyna ýa-da konsullyk edarasyna ýazmaça habar berýär.
Hasaba almak we hasapdan çykarmak boýunça arzalar diplomatik wekilhanalarda we konsullyk edaralarynda saklanylýar we raýat hasapdan çykarylandan soňra bir ýylyň geçmegi bilen resmileşdirilip ýok edilýär.

Daşary ýurt döwletlerinde hemişelik ýaşaýan

we wagtlaýyn bolýan Türkmenistanyň raýatlaryny

Türkmenistanyň daşary ýurt döwletlerindäki

diplomatik wekilhanalary we konsullyk edaralar

tarapyndan hasaba almagyň Tertibine

goşundy

Daşary ýurt döwletlerinde hemişelik ýaşaýan we wagtlaýyn bolýan Türkmenistanyň raýatlaryny

HASABA ALYŞ ÝAZGYSY

		Foto surat üçin ýer
Familiýasy, ady, atasynyň ady
Doglan senesi we ýeri
Jynsy
Türkmenistanyň raýatynyň Türkmenistandan gitmek we Türkmenistana gelmek üçin pasportynyň (Türkmenistanyň raýatlygyny tassyklaýan beýleki resminamanyň) belgisi, beren edara, berlen senesi we hereket ediş möhleti
Türkmenistanyň raýatynyň Türkmenistandan gitmek we Türkmenistana gelmek üçin pasportynyň (Türkmenistanyň raýatlygyny tassyklaýan beýleki resminamanyň) nusgasy (elektron doldurylýan arzalar babatynda ulanylýar)	(pasportynyň nusgasy berkidilýär)
Daşary ýurt döwletine wagtlaýyn bolmak ýa-da hemişelik ýaşamak üçin gelen senesi
Daşary ýurt döwletinde wagtlaýyn bolmagy ýa-da hemişelik ýaşamagy meýilleşdirýän döwri
Telefon belgisi
Elektron poçtasynyň salgysy (eger bar bolsa)
Türkmenistandaky salgysy (eger bar bolsa)
Daşary ýurt döwletindäki häzirki ýaşaýan salgysy
Zähmet çekýän ýeri, eýeleýän wezipesi we salgysy (bilim alýan okuw mekdebiniň ady we salgysy)
Raýatyň hukuklaryny we bähbitlerini üpjün etmek bilen bagly meselelerde habarlaşmak üçin Türkmenistandaky we daşary ýurt döwletindäki ýakyn adamlarynyň familiýasy, ady, öý salgysy we telefon belgisi
Türkmenistanyň beýleki bir diplomatik wekilhanasynda ýa-da konsullyk edarasynda hasapda durmy ýa-da ýok (duran halatynda diplomatik wekilhananyň ýa-da konsullyk edarasynyň ady)
Raýatyň ýerine hasaba alyş ýazgysyny dolduran kanuny wekil barada maglumatlar (kanuny wekil ýuridik şahs bolan halatynda onuň adyndan çykyş edýän fiziki şahs barada maglumatlar)	Familiýasy, ady, atasynyň ady
	Doglan senesi
	Ýaşaýan salgysy
	Telefon belgisi
	Elektron poçtasynyň salgysy
Bellikler