2018-nji ýyla paýtagtymyz Aşgabatda agyr atletika boýunça Dünýä çempionatynda mynasyp derejede çykyş eden türkmen türgeni Ýulduz Jumabaýewa özüniň altyn medalyna mynasyp boldy. Hormatly Prezidentimiziň gatnaşmagynda türkmen türgeni Ýulduz Jumabaýewanyň mynasyp bolan altyn medalynyň gowşurylyş dabarasy geçirildi.
Paýtagtymyz Aşgabatdaky Olimpiýa şäherçesiniň Başa-baş söweş sungaty sport toplumynda guralan dabara hökümet agzalary, ýurdumyzdaky daşary ýurtly diplomatik wekilhanalarynyň ýolbaşçylary, halkara we sebit guramalarynyň ýurdumyzdaky wekilhanalarynyň ýolbaşçylary, ýerli we daşary ýurtly köpçülikleýin habar beriş serişdeleriniň habarçylary gatnaşdy. Bu dabara “Atavatan Türkmenistan” halkara žurnaly hem çagyryldy.
MILLI LIDERIMZI TÜRKMEN TÜRGENINE ALTYN MEDALYNY GOWŞURDY
Hormatly Prezidentimiziň gatnaşmagynda geçirilen dabarada Ýulduz Jumabaýewanyň mynasyp bolan medaly gowşuryldy. Milli Liderimiz türkmen türgenine medalyny gowşuryp, oňa geljekki sport durmuşynda üstünlikler arzuw etdi.
TÜRKMEN SPORTUNYŇ ÖSDÜRILMEGINE ULY ÄHMIÝET BERLER
Hormatly Prezidentimiz türkmen türgeniniň dünýä çempiony hökmünde ykrar edilmegi bilen baglanyşykly geçirilen dabarada edilen çykyşynda türkmen sportunyň mundan beýläk-de ösdürilmegine uly ähmiýet beriljekdigini belledi.
Türkmen sportunyň taryhynda uly baýrakly orunlara mynasyp bolan türgenleriň köpdügine ünsi çeken milli Liderimiz agyr atletika boýunça dünýäniň 3 gezek çempiony Altymyrat Orazdurdyýewiň hem-de 1960-njy ýylda geçirilen XVII Olimpiýa oýunlarynda sapançadan ok atmak boýunça kümüş medalyň eýesi, dünýäniň ýedi gezek, Ýewropanyň hem üç gezek çempiony Marat Nyýazowyň atlaryny agzap geçdi.
HALKARA SPORT GURAMALARYNDAN MINNETDARLYK
Halkara agyr atletika federasiýasynyň (IWF) ýolbaşçysy Maýkl Irani hem-de Halkara agyr atletika federasiýasynyň (IWF) kätibi, Aziýanyň agyr atletika federasiýasynyň baş sekretary Mohamed Hassan Jaloud medal gowşurylyş dabarasyna onlaýn tertibinde gatnaşdy.
Bu halkara sport guramalarynyň ýolbaşçylary Türkmenistanda agyr atletika sportunyň ösdürilmegine goşýan goşandy üçin milli Liderimize uly hoşallygyny bildirdi. Maýkl Ireani hem-de Mohamed Hassan Jaloud öz çykyşynda Türkmenistanyň adalatly sportuň dünýäde giňden dabaralanmagyna goşant goşýandygyny, türkmen türgeni Ýulduz Jumabaýewanyň gazanan bu üstünliginiň hem munuň aýdyň subutnamasy bolup durýandygyny belledi.
TÜRKMEN TÜRGENINE GYMMATBAHALY AWTOULAG SOWGAT EDILDI
Türkmenistanyň sport abraýyny belende galdyran, agyr atletika boýunça Dünýä çempionatynyň altyn medalynyň eýesi Ýulduz Jumabaýewa hormatly Prezidentimiziň adyndan “Lexus LX 570 Sport Plus” kysymly gymmatbahaly awtoulag sowgat edildi.
Mälim bolşy ýaly, bu türgenimiz dünýä çempionatynda 45 kilogram agrama çenli agramda çykyş edip, Tailandyň 2 türgeni bilen baýrakly orunlar üçin bäsleşdi. Netijede tailandly türgen birinji orny eýeläp, altyn medala, Ýulduz bolsa kümüş medala eýe bolupdy.
Altyn medal gazanan tailandly türgen tarapyndan doping düzgünleriniň bozulandygy hem-de sport kwalifikasiýasyndan mahrum edilendigi sebäpli Halkara agyr atletika federasiýasynyň kadalaryna laýyklykda, medallaryň gaýtadan paýlanylmagyna aýratyn üns berilýär. Şunuň bilen baglylykda, medallaryň gaýtadan paýlanylmagynda türkmen türgeni Ýulduz Jumabaýewa altyn medalyň eýesi boldy. Bu türkmen türgeniniň dünýä çempionatlaryndaky ilkinji uly üstünligi boldy. Ol itekläp götermekde hem-de umumylykda 2 altyn medaly gazandy hem-de ýetginjekleriň arasynda dünýä rekordyny goýdy.
Dabaradan soňra metbugat wekillerine beýanat beren Ýulduz Jumabaýewa Türkmen Döwlet bedenterbiýe we sport institutynda okaýandygyny belläp, dünýäniň ençeme ýaryşlarynda baýrakly orunlary eýeländigini belledi. Bu gazanan üstünliginiň oňa geljekki ýaryşlarda has gowy çykyş etmegine mümkinçilik berjekdigini belledi.
Atavatan Applikasiýasy täzelendi: Intellektual sahypamyz goşuldy