BIZNES

«Ynamly taksi» işläp başlady

«Awtoulag kärhanalar birleşigi» açyk görnüşli paýdarlar jemgyýeti Aşgabatda onlaýn taksi çagyrmak hyzmatynyň işe girizilendigini habar berýär. Taksini 0656 gysga belgä jaň edip ýa-da «Ynamly taksi» mobil goşundysy arkaly sargyt edip bolýar.

Häzirki wagtda mobil goşundysyny diňe «Google Play» arkaly ýükläp alyp bolýar. Şeýle-de ýakyn wagtda onuň «App Store»-da hem peýda boljakdygy hem aýdylýar.

«Awtoulag kärhanalar birleşiginiň» bellemegine görä, goşundy smartfona gurnalandan soň, taksi sargyt etmek üçin barmaly ýeriň salgysyny girizmek ýa-da ony kartada saýlamak ýeterlikdir. Goşundy GPS-iň kömegi bilen ulanyjynyň ýerleşýän ýerini kesgitleýär we ýolagçy boljak adamyň maglumatlary barada sürüjä habar berýär.

Sargydyň tassyklanmagy we awtoulagyň gelmegi barada ýolagça SMS habarnamalary iberilýär. Saýlanan nyrhnama we ýoluň uzaklygyna baglylykda, geçilen ýoluň bahasy çykarylýar. Ýoluň takmynan bahasy mobil goşundyda görkezilýär.

Taksi barmaly ýerine geleninden soň ýoluň gutarnykly bahasy ýolagçynyň telefonyna habarnama arkaly iberilýär. Mundan başga hem ykjam goşundyda gatnawlaryňyzyň taryhyny görüp bilersiňiz. Goşundynyň goşmaça aýratynlygy hökmünde bolsa «Halaýan ýerlerim» funksiýasynyň girizilendigini görkezmek bolar. Onuň kömegi bilen iň köp barýan ýeriňiziň salgysyny girizip bilersiňiz.

Häzirki wagtda sargyt üçin diňe nagt töläp bilersiňiz, ýöne ýakyn wagtda sürüjiniň terminaly arkaly bank karty bilen tölegleri, şeýle hem onlaýn tölegleri girizmek meýilleşdirilýär.

Ýene-de okaň

Türkmenistan Russiýada geçiriljek halkara ykdysady foruma gatnaşar

Gyrgyzystan 2030-njy ýyla çenli döwür üçin ösüş maksatnamasyny kabul etdi

Türkmenistan IV Daşkent halkara maýa goýum forumyna gatnaşýar

Ata Watan Eserleri

SOCAR bilen german kompaniýasy gaz satyn almak boýunça 10 ýyllyk şertnama baglaşdy

«Daýhanbank»:bank kartlarynyň sany 2 milliondan geçdi

Pileçilerimiz Watan harmanyna 2100 tonnadan gowrak pile tabşyrdy