2024-nji ýylyň 15-17-nji ýanwary aralygynda Ýewropa Komissiýaysnyň wise-prezidenti Margaritis Shinasyň ýolbaşçylygyndaky wekiliýet Merkezi Aziýa döwletlerine resmi saparyny amala aşyrýar. Bu wekiliýetiň Türkmenistana sapary 17-nji ýanwarda göz öňünde tutulandyr. Bu barada ÝB-niň Türkmenistandaky wekilihanasy habar berýär.
Bu sapar “Ýewropa-Merkezi Aziýa” maýadalaryň forumynyň öňüsyrasynda amala aşyrylýar we Ýewropa Bileleşigi bilen Merkezi Aziýa sebitiniň hyzmatdaşlygynyň ösýändiginiň alamaty bolup durýar.
Ýewropa Komissiýaysnyň wise-prezidenti Margaritis Shinasyň saparynyň çäklerinde Türkmenistanyň Prezidenti tarapyndan kabul edilmegine garaşylýar.
Şeýle hem Margaritis Shinas Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow bilen duşuşar.
– Men Merkezi Aziýanyň 5 ýurduna saparyma başlaýaryn. Bu sapar şu ýylyň 29-30-njy ýanwarynda Brýusselde geçiriljek “Ýewropa-Merkezi Aziýa” maýadarlar forumynyň öňüsyrasynda geçirilýär we ÝB bilen sebitiň arasyndaky hyzmatdaşlygynyň ösýändigini görkezýär – diýip, Ýewropa Komissiýasynyň wise-prezidenti özüniň jemgyýetçilik torunda habar berdi.