«Türkmen Awtoban» paýdarlar jemgyýetiniň binýadynda “Ulag hyzmatlary” ýolagçy gatnatma kärhanasyny döretmek meýilleşdirilýär. Bu barada “Watan” habarlar gepleşiginde bellenilip geçilýär.
Ministrler Kabinetiniň sanly ulgam arkaly geçirilen mejlisinde Ulag hyzmatlary ýolagçy gatnatmak kärhanasyny döretmek hem-de bu ugurda hyzmatlary ýola goýmak babatda hasabat berildi.
Aşgabat-Türkmenabat ýokary tizlikli awtomobil ýolunyň gurluşygynyň dowam etdirilýändigi hem-de Watanymyzyň Garaşsyzglygynyň şanly 30 ýyllygyna gabatlanylyp, bu awtomobil ýolunyň Aşgabat-Tejen böleginiň ulanmaga berilmeginiň meýilleşdirilýändigi bellenildi.
Halkara ýolagçy gatnawlaryny ýola goýmak hem-de bu ugurda ýokary hilli hyzmatlary üpjün etmek maksady bilen “Ulag hyzmatlary” kärhanasyny döretmek göz öňünde tutulýar.
«Türkmen Awtoban» paýdarlar jemgyýeti tarapyndan ýolagçy awtobuslaryny hem-de ýeňil awtoulaglary satyn almak baradaky teklipleriň öwrenilendigi bellenildi. Şunuň bilen baglylykda, “Türkmenawtoulaglary” agentliginiň awtoulag menzilleriniň hyzmatyndan şertnamalaýyn esasda peýdalanmak arkaly ýolagçylara ýokary hilli hyzmatlary ýola goýmak boýunça degişli işler alnyp barylýar.